VIP yimya samatsütsü asoshi PM-i sentong yangluba Preity-i pela agizük

Chandigarh, April 30 (Agencies): India nung VIP yimya mamshitsü asoshi sorkari sentong yangluba atema actress Preity Zinta-i pelaba olen ka Deobarnü sangdongogo.
“Asen Ato Kelonser asoshi nisung ajak tongtipang lir aser pai iba ama mapa inyaker. Linük tejakleni anir aoba kisüng masü saka nüburtem ajunga tensema tejakleni anir aotsü asoshi inyaker. Pa ama Ato Kelonser ka asenoki ngutetba ya kanga tia taka,” ta arishi küm 42 tain, Preity Zinta-i ashi.
“Beti Bachao-Beti Padhao sentong ya kanga junger aser ni meimer. Tetsür ka asoshi kümzüka alitsü aser kaket shisatsü angutsü ya tongtipang lir. Ni mitkar ka tanur asünung, Ato Kelonser-i linük asoshi bendanga agütsüba onük tem mitkar den jembiba ngua ni kanga pelar,” ta laisa shisem.
Bollywood nung la indang mapa tem asüngdang dang, “Kü indang film yakta sayatsü. Anu film tasen nung shilem agitsü akok,” ta lai langzü.
Preity Zinta ya tetsürtem kümzüka alitsü asoshi mapa balala inyaka arutagi.
“Kü takum nung mapa tulu ka lir, aser iba mapa ji tetsürtem kümzüka alitsüba atema lir. Iba maparen nung ni küm pongu tashi inyaka arutagi aser taküm nünoki angutsü,” ta Preity Zinta-isa ashi.