Virat Kohli ya India nunger nüngtugu nisungtem rongnung jenjang temaba lir

New Delhi, December 21 (Agencies): Cricket asayar mongin, Virat Kohli-i Bollywood superstar Shah Rukh Khan melena India nunger nüngtugu nisungtem rongnung jenjang temaba kümogo.
‘Rise of the Millennials: India’s Most Valuable Celebrity Brands’ nüngja nung 2017 report ka Duff & Phelps ajanga agütsüba nung, Kohli ya brand value sen million $144 lir, aser pa sülen Shah Rukh Khan (sen million $106), Deepika Padukone (sen million $93), Akshay Kumar (sen million $470 aser Ranveer Singh (sen million $42) lir.
Duff & Phelps ya global valuation aser corporate finance advisor lir, aser India nung nüngtugu nisungtem indang brand value bushisüngdangba asembuba sayaogo.
“Onok ranking saya tenzüker tang mezüngbuba Shah Rukh Khan ya temaba jenjang nungi alua Virat Kohli-i melenogo. Consumer tem puatsü atema on-field nung junga shilem agiba aser off-field nunga sempet tajung aliba ajanga Kohli ya mezüng shimteter,” ta Duff & Phelps Managing Director aser Regional Leader – India, Japan aser South East Asia, Varun Gupta-i sangdong ka nung ashi.
“Kohli den lanur nüngtugu nisungtem rongnungi actress Alia Bhatt, actor Varun Dhawan aser badminton asayar P.V. Sindhu nungera jenjang temaba nung ajungketogo, mesüra top 15 list nung densemogo,” ta Gupta-i shisem.
“Temaba jenjang 15 nung Bollywood nungi nüngtugu nisungtem timba lir, saka asayar Kohli, Mahindra Singh Dhoni aser Sindhu nungera jenjang tajung nung lir, aser parnok ajak indang rongsen ya meyokteper million $180 ajunger,” ta Duff & Phelps Director Aviral Jain-i ashi.