Visasolie Nagaland BJP tir asütsü

Dimapur, Jan 11 (TYO) : Nagaland nung BJP tir asütsü asoshi züngsem ajaki mulunga Visasolie Lhoungu aser BJP National Council nung Nagaland state representative asütsü atema Khonwang Konyak shimtetogo. Parnok lenisüba nung 2016 küm nungi tenzüka aotsü.
Tanü Nagaland BJP lenirtem shimba sentong ya State Election Officer, BJP MLA Mhomlumo Kikon (Parliamentary secretary Border Affairs & Skill Development) ketdangsüba nung BJP national secretary, Ramen Deka lia agia liasü. Deka ya Assam nungi adokba Lok Sabha MP lir.
Hombar nikongdang yangi Hotel Saramati, Dimapur nung osangbenertem den jembidang, BJP tir tasenba Visasolie-i parnok teloki pa dak temulung lemteta BJP Nagaland nung tir asütsü shimtetba asoshi pelaba metetdaktsü. Pa nükjidong tulutibaji Nagaland nung tesem ajaklen BJP telok tashi itshidaktsütsü aser tangatetba nung lidaktsütsübaji asütsü ta metetdaktsü.
Paisa ashiba agi, Nagaland BJP nung takotet lenir aika alinungji parnok den yaritepa tajungba inyaktsü aser 2018 kümbo Nagaland nung BJP sorkar akümtsüsa inyaktsü.
Tang shimba Nagaland BJP tir tasenba Visasolie ya 2014 küm Neiphiu Rioi azüngtettsüba Northern Angami II Assembly Constituency nung by election mapang toktep saka NPF candidate aser Rio tanük Neiphrezo Keditsu makok tsük.
BJP Minority Morcha aser Nagaland in-charge aser BJP National Secretary In-charge, Farooq Khan-i ashiba agi, BJP leniri agütsüba nükjidong tongteta inyaktsü asoshi kanga meranga inyaktsü aser tarutsü nung kenü anogobo Nagaland nung BJP sorkar akümtsü teimla tulu lir ta paisa metetdaktsü.
Paisa Wb.Mhomlumo Kikon dang telok lenir shimba maparen kanga junga ketdangsüa otetba atema pelaba metetdaktsü.
Khan-isa tir tejenba Dr. M Chuba Ao-i Nagaland nung BJP timatemba mapang bendanga agüja tenzüka aruba asoshi pelaba metetdaktsü. Pa mapang Nagaland nung BJP telok kanga inogo aser iba tamaitsüji tanü election kanga süngjema agitetogo ta paisa pelaba o ka shisem.
January 12 nü Nagaland BJP nung tejen aser tasen lenirtem den tenüngsang agütsüba sentong ka BJP party office, Naga Shopping Arcade, Dimapur nung alitsü ayongzüka lir.