“Vision Mokokchung 2040” atema sentong ka agi

Dimapur, November 22 (TYO) : November 19, 2015 nü Mayangnokcha Award Trust (MAT)-i Mokokchung District Art & Culture Council (MDACC) den yaritepa “Vision Mokokchung 2040” sayaba sentong ka agi.
Iba sentong ya ADC (Planning) Conference Hall, Mokokchung nung ayongzüka agi aser Rajesh Soundararajan, IAS, ADC Mokokchung-i Core Committee tenüng nung tesentepertem ajak pela agizük.
Iba sentong ya Akok Walling, MAT President aser Supongasang, MAT Trustor na menden ser shilem asem lemsar agi.
Mezüngbuba shilem nung Er. Moa Aier, MAT Trustor-i Vision document indang taginübatem metetdaktsü aser iba onük sülen lokti olemtepba mapang agi.
Tanabuba shilem nung Dr. Sunep Imchen, MAT Trustor-i Mindset Change, Sanitation & Waste Management, Tradition, Culture & Modernity indang onüktem jembi aser iba sülen olemtepba mapang liasü.
Tasembuba shilem nung Panelist Er. Moa Aier-isa Liberated Mind, Concept of Mokokchung aser Justice, Peace & Development onüktem jembi.
Telok balala aser kijatemi tezüluba nung parnok tebilembatem agütsü. Olemtep aliba mapang, gari lenmang, tzü, electricity, shisaluyimdak, saisapongdak, medical & health care, museum & library, town park, digital highway, tourism, food processing, town expansion, peace & freedom, telok aser arogotem teinyaktsü, entrepreneurs yaritsü amala onüktem benoka lemsatep.
Sentong tembanga o jembidang Akok Walling-i, asenok longjemra Vision Mokokchung 2040 ya nübortem sentong ka kümdaktsütsü aser ibaji ajanga temelenshi jenti angutsü, ta ashi.
Iba sentong nung Mokokchung renloktsü aser tejakleni aotsü atema süoki ia bilemer telok aser kijatem aika aden aser Mrs. Obangla, President, Social Service Society-i tenüngsang agüja sarasadema tembang.
Iba dak sendakba nung tebilemba lemsatepnürtem aser osangtsüsang metetpelanürtemi www.facebook.com/groups/ilovemokokchung ajanga tongteprateptsü akok. Ano, moaaier@gmail.com mesüra akok_n@yahoo.co. ajanga e-mail mesüra 8794158145 dangi text mesüra whatsapp ajanga osang metetpelatsü akok.