Viswema Yoga & free health camp agi

Kohima, March 20 (TYO) : Honibarnü Viswema Village Council nung Utkarsh Society for Social Change & Economic Reform, New Delhi-i Yoga Program aser Free Medical Health camp ka ayongzüka agi.
Iba sentong ya Ayurveda nung ajemdaker agi aser tongti tesemdangerji Programme Officer, AYUSH, Directorate of Health & Family Welfare, Nagaland, Dr. Seyiekhrietuo liasü.
Sentong nung tongti tesemdanger o jembidang Dr. Seyiekhrietuo-i AYUSH indang mozü amshiyim metetdaktsü.
Ayushi ta asübaji A-Ayurveda Y-Yoga U-Unani S-Sidha H-Homeopathy lir aser Ayush mozü ajanga tanga timtem bener marutsür, Ayush mozüi tera nungi jungdaktsür aser Ayush mozüji jenjang tasak masü, ta Dr. Seyiekhrietuo-isa ashi.
Health and Family Welfare Department kübok Ayush department nung nübo peria maliser mapa inyaker ajisüaka tarutsü nungbo iba department ya balaka razüka aotsü imlar, ta paisa shisem.
Yoga indang onük jembidang Dr. Seyiekhrietuo-i ashiba agi, nisung aikati Yoga ya Hindu yimsü den sendaktepa lir ama bilemer.
Ajisüaka, tamangba yimsü mashi amanger kati Yoga practice sütettsü aser iba ajanga tashidak aika jungdaktsür, ta paisa metetdaktsü.
United Nations-ia Yoga indnag tongtipang aser tajangzük anguba ajiteta June 21 nü Yoga day amungtsü mulunga agizükogo, ta Dr. Seyiekhrietuo-isa ashi.
Yoga training ji Yoga Instructor K. Lawrence-i anir agi aser Naga Hospital Authority Kohima nungi Dr. Mary Belho o Dr. Vicino Nakhro nati medical camp agi.
Iba sentong nung nisung 120 aden aser shiranger 50 tashi medical camp nung teyari agütsü.
Iba sentong nung mendenji Viswema Youth Organisation tir, Eyosa Kikhi liasü, VCRC, Khrüseho Khrie-o-i temoatsü meshia sarasadem aser Zholezo Pucho-i anküp tepela o jembi.