Vladimir Putin-i tekeratiba nung Kim Jong Un ajurutsü renema lir: KCNA

Moscow, Luroi/August 15 (Agencies): Korean Peninsula nung tensa tajungba akümba mapang ka nung Russia Tir, Vladimir Putin-i North Korea lennir, Kim Jong Un tekeratiba nung ajurutsü renema lir, ta North Korea sorkar meyong osang ka ajanga Rasemnü metetdaktsü.
Taruba ita Vladivostok nung economic forum indang senden ka nung adentsü asoshi Putin-i South Korea Tir, Moon Jae-in aser Kim na Aami/June nung jaoka, saka iba tejaokba nung North Korea lenniri telangzüba agütsüba osang mangashi.
World War II tembangdang Japan nungeri Korea madak yimsü asüba tembangba bilemteta North Korea-i National Liberation Day amungba mapang Putin-i Kim dang iba summit indang nenshia ashi.
“Linük ana tsüngta tesendaktep ken o tekeratiba nung jembitsü aser region nung tongtibang onüktem jembitsü asoshi ni na tekeratiba nung ajurutsü renema lir ta sangdonger,” ta Putin-i ashiba osang ya North Korea indang Korean Central News Agency nung adoktsü, saka iba osang nung tena ajuruteptsü atema anogo tejangja agüja mali.
Putin-isa tarutsü nung linük asem longjemshitsü imlaba indang densema ashi aser yangji South Korea dena lir.
Kim-ia Putin dangi osang ka yokba nung, Japan den raraba mapang longjemba du linük ana tsüngta tashi tait tesendaktep tenzükdak liasü, ta KCNA ajanga ashi.
Iba osang nung Putin-i jaokba indang telangzüba agüja mali, aser Kim-i ia osang ya Moscow-i shidi züluba sülen asü iba jakdang agütsüar KCNA-i jangja shia mali.
Winter Olympic sülen Korean Peninsula nung tensa tajungba küma Kim-i South Korea Tir, Moon Jae-in anaben ajuruba den külemi China Tir Xi Jinping aser US Tir Donald Trump ajurua lir.