VNL aser BSNL nati linük nung ‘disaster management’mapa tenzüker

New Delhi, September 28 (Agencies) : Linük nung telecom dak sentakba kecisarena agütsüba company Vihaan Networks Limited (VNL)-i “Relief 123” service tenzüktsü asoshi Brihostibarnü Bharat Sanchar Nigam Limited (BSNL) den Memorandum of Understanding (MoU) ka nung sign sütepogo. Iba inyakyim ajanga Linük nung lendongtsüdong atalokba mapang teyari agütsütsü.
“Relief 123” service ya lendong mapang nüburtem nem teyari agüja kümzüka lidaktsütsü asoshi lir. Iba inyakyim ya VNL-i apitet aser ibaji atema tongtepratep maparenji BSNL-i shilem asütsü.
“Asen linük nung ajungben alima lendong jenti mapa aben ataloker, anungji iba mapang shitak nung teyari agütsütetba aser tongteprateptetba ajanga aser iba den külemi rescue operations indanga aliba ajanga nüburtem nem tejenokdak aser anisüngzükdak agütsütettsü,” ta Chairman & Managing Director, BSNL, Anupam Shrivastava-i tang New Delh nung tagidak aliba ‘India Mobile Congress (IMC) 2017’ sentong nung metetdaktsü.
Iba tongtepratep tejangja yutetba ajanga BSNL aser disaster management agency tem — National Disaster Management Authority (NDMA) aser National Disaster Relief Force (NDRF) ajak sabang ka nung sentaktepa akümtsü.
“Mobile Congress sentong mezüng anogo nung, Latin America nungi company katia onok den iba inyakyim nung sentaktepa kümogo. Iba technology ya mezüng India nung tendang aser ya noklang nung noklang takoktsü mapa lir,” ta Founder Chairman, VNL, Rajiv Mehrotra-i osangbenertem dang ashi.
“Relief 123” ya “ResQMobil” nung amendaker yanglua lir, ibai ‘integrated portable communication solution’ lir aser hardware ajanga bendenba osang tejangjaji ‘portable transportable trailer-on-wheels’ nem agütsür.
Iba service ajanga lendong atalokba tesem den tesendaktep kanga junga yutettsü, timtema aliba nüburtem bushia sabang aika nem osang agütsür teyari tekaratiba nung meshia anepalutettsü.
Iba inyakyim ya Saarc linüktem nunga amshitettsü, aser ibaji atema local mobile service operators temi BSNL nem roaming tenangzüktetba agütsütüla.
Company anaprongla ya taoba mapangtem nunga lungjemersa inyakogo. Parnoki linük nung Left-wing tesemtem nunga voice aser data connectivity atema lungjemer inyakogo.