Vodafone aser Idea Cellular na lokteptsü akok

January 28, 2017 (Agencies): India nung cellular service agütsür Vodafone aser Idea Cellular Ltd na lokteptsü akok. Osang ajanga ashiba agi, iba longjemtsü sentong ya mapang tatsüka asoshi jembia arudar. Reliance Jio, telecom sector-i aitba sülen, mobile internet aser o jembiba angati kümdaktsüba agi, parnok nem tetoktepba agütsüba ajanga, parnok shishilembaba kümzüka ayutsü asoshi iba sentong asayameyangdar, ta osang ajanga shisem.
Taoba mapang Vodafone-i IPO ka atema sentong yanglua aliba Jio amenba ajanga ken atema anena atar. Maneni iba telongjem ajanga linük nung telecom sector nung tulutiba aser tashitaittiba Bharti Airtel den tokteptsü asoshi jenjang tasen ka asütsü. Airtel pur küm tatemlen parnoki aaba nung shilem 55 ajemzüka aluba jangjaogo.
Vodafone India pur Idea Cellular den longjembaji parnok asoshi tajungtiba asütsü, ta January tetenzüklen CLSA-i osang ka ajanga metetdaktsü. Iba sentong ya atalok nungbo company anaprongla atema parnok mapa inyakyim nung tali akangshitsü.
Maneni prepaid Vodafone Supernet 4G amshirtem atema data pezüben agi tali bendenloktsüba tawa sangdongogo, saka iba sentong ya tesem ajak nung balala asütsü. Iba offer tasenba nung sen 150 agi data pack 1GB, sen 250 agi 4GB aser sen 1,500 agi 35GB ita ka atema angutsü.