Vodafone Diwali nüngtem nung 100MB angati agütsütsü

Kohima, November 05 (TYO): Vodafone amshirtem asoshi osang tajung ka sangdongogo. Vodafone telecom service sangdong ka ajanga ashiba agi, Diwali tenüng nung linük nung Vodafone amshirtem ajak nem 100MB angati agütsütsü.

Kasa sangdong ajangasa ashiba agi, Vodafone Diwali offer ya linük nung Vodafone amshir nisung crore 18.8-i Diwali anogo, November 11, 2015 nü amshitettsü.

Vodafone amshirtemi iba maongka agitsü asoshi ‘DIWALI’ ta ajener 199 dangi SMS yokang, ta company sangdong ajanga ashi.

100MB angati agütsüba ajanga Vodafone amshirtemi kinünger aser tembartem den Diwali salem lemsateptettsü aser internet ajanga Diwali osang yoktettsü.

Iba sentong tajung indang jembiba mapang Vodafone India nung Managing Director aser CEO, Sunil Sood-i, “Vodafone-i nüburtem nem service tajungtiba agütsütsü meranger. Tang ama benjung bentsü mapang data talila kanga nüngdaker. Anungji tan Diwali nung 100MB angati agütsüba ya onok dak tamang kaa aser company meima onok indang service amshir nisung crore 18.8 dang tepela sayuba temaitsü agütsürba lir. Iba den külemi company-i Vodafone amshirtem ajak den Diwali salem lemsateper aser tarütsü anogotem nunga iba ama sentong tajung ajanga service amshirtem den lemsateptsü” ta ashi.