Vodafone-i taküm küm tatemlen 4G amenoktsü

New Delhi, August 28 (Agencies): Airtel-i sangdonger anogo aika süir külen, 2015 küm tatemlen Vodafone India-ia mobile phone tem atema fourth-generation (4G) amenoktsü sentong lir, ta Hokolbar nü sangdongogo.

Iba sentong ya Reliance Jio inyakyim den mesüktepa asütsü.

“Vodafone-i 4G ya mezüngbuba Mumbai, Delhi, Kolkata, Bengaluru aser Kochi yimtitem nung amenoktsü,” ta company sangdong ka ajanga metetdaktsüogo.

Iba den külemi parnokisa par meyong 3G network-a North-East nung Assam, Uttar Pradesh-West, Rajasthan, Karnataka, Kerala aser Odisha nung amenoktsü.

“4G tendangba kanga takok ngua tembangogo. Iba maparen nung Vodafone-i ‘global technology infrastructure service providers’ tem den lokteper inyaker,” ta kasa sangdong ajanga ashi.

Pan-India 4G bo mapang tetemsü ka nung amenoktsü, ta sangdong ajangasa ashi.

August 6, 2015 nü Bharti Airtel-i 4G mobile phone service ajanga jila 300 ayimbangtsü ta metetdakja liasü. Reliance Jio danga Airtel-i mezüng 4G amenoktsü sangdonga liasü.

Vodafone sangdong ajanga ashiba agi, tanü asüng adokba technology tasen kar amshia onoki tamshirtem asoshi network tajungtiba aser tekaraba agütsütsü nükjidong nung maparen inyaktepdar.

Vodafone India-i telungtet pongu, Mumbai, Delhi, Kolkata, Kerala aser Karnataka nung 4G (LTE) spectrum densema amenoktsütsü sentong lir aser iba telungtet pongu kija yagi Vodafone nem noklang nung shilem 50 shi tajangzük agütsütsü teimla lir.

Alima ajak nung kodang reprangdangdir, Vodafone-i linük 18 nung 4G amenadokogo aser iba network amshir temji nisung million 20 dak tema kümogo. Tamshir jangradaktsütsü atema parnok meyong 4G ajanga ken, saisapong aser TV sentongtem reprangtettsüsa enokja lir.

4G amenoktsü sentong nung parnoki intong 23,000 dak tema amenoktsü tesem yateta lir aser ajak meyoktepa parnok meyong intong amenokba tesem 1,31,000 dak tema akümer.

“Vodafone India-i iba maparen tulu asoshi sen endoktsü mesasatsü koba ajanga network tali ulua akümtsü aser ibaji ajanga tamshirtem jangratema amshitsü,” ta sangdong ajangasa ashi.