Volkswagen-i Diesel gari million 11 tashi tanaben yanglushitsütsü

Berlin, September 30 (Agencies): Germany nung tentetba gari yangluba telok, Volkswagen-i alima tesem balala nung yokshia aliba gari million 11 shi tanaben yanglushitsü lemtetba osang ka tanü Bodbar nü metetdaktsüogo.

Tetendangertem nem gari nungi tango tamajung adokbaren meputetdaktsütsü nükjidong nung par Volkswagen teloki oset kar mesenlokba osang bushitetba sülen kasaji tanaben melenshia yanglutsütsü asoshi tan telemtetba agir lir.

“Ozü teloki alima tesem balala nung yokshir aliba gari million 11 shi nung iba tashishitsü aketba osetji mesenlokja lir aser item diesel garitemji tanaben yanglushitsü asoshi tanaben ozü factory tonga bener arutsü osang tarutsü anogo ishika tsüngda nung sangdongtsü renemogo,” ta tawa shimba Volkwagen Chief Executive Officer (CEO) tasenba, Matthias Mueller-i tanü metetdaktsü.

Gari yanglur mongintemi ashiba agi, tan mesenlokba tashishitsü aketba osetji mesenzüka tim oset tanaben mesenloktsü maparen inyaktsü asoshi dollar sen billion 6.5 shi nungdaktsü.

Taoba Wolkswagen CEO, Martin Winterkorn melenzüka taoba Hokolbar nü nungi tenzüka CEO menden benoksang, arishi küm 62 tain Mueller-i par telok tesepti, Wolfsburg nung tongti manager 1000 shi den senden ka amenba sülen tan telemtetba ya agiba osang jangjaogo.

Volkwagen teloki yangluba diesel gari nung gari tendangdang tango tamajung madokdaktsüba aser oda lenmang nung anishidang tango tamajung adokba azüokba oset nem mapa meinyakdaktsüba oset mesenlokba osang US Environmental Protection Agency (EPA) ketdangsertemi tan September ita 18 nü bushitetba sülen Volkswagen teloki tan khuret tulu benoka lir.

Aji oda, EPA teloki Volkswagen telok anema dollar sen billion 18 jenjang aketba ken o okadak tang benoka lir.