Volvo XC90 dangi ita ana nung order 266 aru

September 07, 2015:India nung Volvo XC90 sayar ano ita ana buba ang lir saka order 266 tashi jilia süadokogo.

Iba gari ya Volvo meyong Scalable Product Architecture (SPA) nung ajemdaker yangluba mezüngbuba gari lir. Sweden nung gari yanglurtemi tan ita tatemlen tashi nungbo iba gari order asürtem nem gari tongtsütsü nükjidong nung inyaktepdar.

XC90 SUV gari tasenba ya alima ajak senteper tang tashi nung order ajak agi 57,000 süa lir. Anungji Torslanda plant Gothenburg, Sweden nung XC90 yanglurtemi item order meneptsütsü nükjidong nung mapang talila inyaktsü tenzükogo.

Volvo Auto India Managing Director, Tom von Bonsdorff-i, “Gari tasenba XC90 tenzükli yongi telangzüba kanga junga nguogo. Anungji Volvo garitem asoshi onok atema ano küm tajung ka asütsü. Tan XC90 gari sayaba ajanga ano tarutsü nunga jangratemtsü garitem yanglutettsü tashi aliba sayur,” ta ashi.

Volvo-i iba gari tasenba XC90 ya D5 telemsa apir Mumbai ex-showroom nung sen lakh 64.9 aser lakh 77.9 latetja lir.

SPA inyakim nung ajemdaker yangluba XC90 SUV gari nung head-light ajak LED enokja lir. Gari telung kanga tesadem aser temerük. Tanbo Volvo-i tenemshitsü aika meinoktsü saka central console nung tenemshiba 8 dang enokja lir. Item tenemshiba ti rongnunga iPad mesükba touchscreen amshitsü asoshi tenemshitsü timba lir.

Home screen ji zone pezü küma lemsaa lir: Navigation, Music, Phone aser Sound. Item ajak ya screen nungji tetangshi dang tangshi nung reprangtettsüsa tulu lapoktsü.

XC90 nung 2.0-litre, 4-cylinder, automatic 8-Speed AWD den 225bhp aser 470Nm tashi (torque) keta lir.