Vote agütsürtem anogo

Asüng January 25 anogo ya linük ajungalen vote agütsürtem anogo amongtsü asoshi Election Commission of India-i state government ajak dang nenshia metetdaktsüogo. Iba anogomong takok ngua amongtsü asoshi state government kübok department shia nung linük nung vote agütsürtem anogomong sentong yanglua tenangzükba agitsü asoshi tetuyuba agüja lir. Atangji, iba anogomong monga tenangzükba agitsübaji government mapa nung alirtem dang masü saka linük nung tasoba küm 18 ajungertem nungi tenzüka shirnoksa pei lima aser yimten nung yimsüsür shimtsü asoshi temeten ngua ali, parnok ajak asoshi tenangzükba agitsübaji kanga tongtibang asütsü. Tanü putu nung yimsüsürtem shimtsü asoshi nübortem nem tashi aser temeten agütsüba maongka ya kanga tulu lir. Iba tashi aser temeten yagi yimsüsürtem dangbo nübortemang tashi tuluba akümer. Akhidangbo, yimsüsür shimtsübaji kibong ka senmang ama yimsüsüba menden amangtepa aru, anungji nübortem dak kecha tashi mali asü. Ajisüaka, tanü democracy lima nungbo nübortemiang yimsüsür shimer asünungji, yimsüsüba menden ya kibong mesüra kin kidong ka senmang masü saka nübortemi mulungba shimtsü asoshi nübortem dak tashi aser temeten alinungji, senbso shiai iba temeten ya pei lima yanglutsü asoshi nungloktsüba khuret ka ama agitsü nüngdaker. Nübortemi dang yimsüsürtem shimer asünungji yimsüsüba jungra nübortem nüngsang aser mejungra nübortem nüngsen ta kümogo. Ibaji kodang asenoki angateta election nung shilem agidir, asenok nisung shiai kanga züngzünga aser süoki ia agitsü. Asenoki shimba nisungi asenok agitsüba tzü, mopong, lenmang , kaketreju, mozü ki aser alu indang telemtetba agitsü. Anungji, kodang vote agütsürtemi nisung ka nem vote agütsüdir, iba nisung nemji asenok aser asen chirnurtem atema tang aser tarutsü asoshi telemtetba agitsü tashi agütsür ta angateta election nung shilem agitsüla. Ashiko, aiben asenoki item ama tongtibang taküm nüngdaktem indangji mebilemdangi kinunger mesüra yimtsüryimer apia mesüra senotsü tera aginüba agi election nung zübazübaa shilem agia alitsüa akok. Ibayongji, asenoki aiben asenok atema tang aser tarutsü nüngdak shisadanga jembitsü makokba nisungang ka shimtetshia atatsüa akok. Iba amaji kodang asenoki yimsürsür shimba tashi aser nükjidong mangateti election nung shilem agidir, ashiko, pei lima aser nübortem meima inyaktsüba nisung masü saka pei asoshi rongsen bushitsü atema yimten tashi bushirang ka shimtettsüa akok. Itemji vote agütsütsü temeten alir shia asoshi tekümdangtsü mapatem lir. Joko, ita anasemka tsüngda ano election tuluka ajurutsü. Iba election nunga asenoki tangatetba tajung nung shilem agitsü asoshi asenok mulungjang shia nung  tenangzükba agitsübaji asüng ama Vote agütsürtem anogo ya shitak anogo ka asütsü. Ano, tebilemtsü kaji asenok rongnung aikati election anogo nung vote agütsüi maor, iba jagi nisung shitak ka shimtsüba melena tangar nem meshitakba nisungang ka shimtsü lenmang lapoktsür. Asenbo election nung vote agütsüia mao saka election temerbo vote agütsürtemi akümba government kübok timatemer ta alitsübaji senso ka asoshi tamashi mapa asütsü. Asenoki election anogo ya yimsüsürtem shimba anogo dang masü saka asen lima yanglushitsü atema telemtetba agiba anogo ta angateta shilem agitsüla. Iba tangatetba nung tang nungibo pei vote peisasa enoktsüsa tanitebelem arema vote agütsüi aotsü nangzükdi. Vote ya dokan nung shishilembaba oset masü, anungji election nung vote malitsü aser mayoktsü nangzükdi. Yimten yimsüsürtem shimba mapa ya temeshi aser ochishia inyaktsüba mapa ka lir, anungji election mapang Tsüngrem dang asüngdanga sarasadema shilem agitsü nangzükdi.