Vote ayokba election

Taküm 2018 küm February nung agiba assembly election nung tatar menden 60 asoshi tokteper candidate ajak agi 196 liasü aser parnoki endokba sen ajak agi crore meyirijang ka ser roker ka dak tali liasü ta Youthnet teloki metetdaktsübaji shitak asütsü. Nagaland nung election agiba ya tangatetba agi tarutsü ajungtsü atema yimsüsürtem shimer masü saka vote ayokba aser aliba bazaar lapok amai lir. Youthnet teloki asadangtetba agi, taküm küm election nung candidate katibo crore 30 tashia endokogo. Iba ama sen dang sen maja vote alidang endokba sen meyirijang dak taliji candidate 196 nem lemtsüra candidate shiai endokba senji crore pongo ser tesadang kashibo adoker. Ano, election nung endokba senji voter shia nem lemtsüra vote shia sen meyirijang tershibo adoker. Akaba agi endok asütsüji sen crore 30 endoksangjia khen yujang saka crore pongongo shi endokertemjia kong nungi menoktsü tebilemba nung endok ta khen shisadangtsü nüngdaker. Atangji, candidate karibo lakh majung endokba otsüa lir aser ano karibo lakh ter metsü dang endokba otsüa lir. Ajisüaka, candidate 196 rongnung teimbakati sen crore asem pezü dak tali endoker asütsü. Item rongnung election nung madokertemjibo yutsür tadokertema sen paikaji menoktsübaji tebilemtsü tulu lir. Item sen ajakji asenok atema terenlok mapatem inyaktsü asoshi lemzükba sen nungi menoktsü merangtsü. Ibayongji, asenok lenmang tamajung nung senzür, light junga marur, alu junga meyimtetter, industry-bo kata melapoktetter, taneptsü angutsüsa mozü ki anameta mali, angati kaketshisatsü tajung angudak maka asenok timtemba ajunga ya election nung asenoki vote ayokba agi timatemer ta asenok angatettsüla. Election nung candidate-i kibong shia sen lakh kaka lemja arutsüa akok mesüra gari dena agütsütsüa akok saka sen lakh ka jagi teti atema pei taküm aser kibong jangratema lia aotsüsa kecha meinyaktettsü. Ano, election mapang gari angubajia asensasa asen külakoktsür amato election temerbo gari nung totzüa meinoktettsü aser raksa nunga meyanglutettsü. Election mapang ya senso shia asoshi tarutsü tia yangluba mapang lir. Aonung ka Tsüngremi Solomon dang, na kechi aginür ta asüngdang ama, election mapang candidate-i asenok dang kechi aginür ta asüngdanga alitsüa akok. Idangji, asenokibo sen dang meshir mesüra interview magi ser tezülen nungi chinur mapai idaktsütsü akanger. Asenoki meshibaji kata tajungbo masü. Pie vote melen sen meshiba aser metemsüyonga tezülen nungi government mapa nung idaktsütsü akangba mapatem jagi asenok lima kanga menena kümogo. Iba ama election nung pei vote melen sen meshiba sobaliba tamajung ya memelenshi tashi asen lima tajung küma memelenshitettsü. Tangar lima auyia mapong aser lishia madok topur junga renloktetba ya nübortemi election mapang timi shilem agiba ajanga lir. Tanga lima nunga election mapang sen endoker saka asenok ama vote aliba aser ayokba nungbo meindoker. Ibayongji, election temer külen yimsüsürtemi ochishia meinyakra nübortemi ola adoker aser yimsüsüba menden nungia anendaktsür. Democracy nung nübortem tashiji yamaji amshir. Ajisüaka, asen lima nungbo election mapangang khen candidate dang sen meshidang, tashiyim agi akoktsü merangdang aser tangar melen proxy vote enoktsüdang nübortem tashi metetter. Iba tashijibo sen agi alia sayudaktsüba noksa ka amai dang lir. Aji oda, election nung sashisashia shilem agiba ama, election temer külena asenoki asenok atema terenlok mapa inyakbatem nung sashisashia shilem agitet asübo asenoka tanü amai pei nüngdak meperitet timtemabo melila. Senyong asen vote yoka election aika agiogo aser iba ama election agi shia asenok tesensakba akümba asenoki metetter. Joko, senyong vote ayokba aser aliba election-bo magili saka tarutsü yimtenyimli yanglutsü atema yimten aser loktiliba dak aketba onük jembia ochi agi pei lima aser nübortem meima tenzüktsüba nübo tajung shimba chichiba election agitsüdi.