Voter-tem anogo

Tanü ya linük ajaklen voter-tem anogomong amonger aser taküm 2017 küm asoshi shimtetba iba anogomong omenji ‘lanurtem nem tashi agütsüba aser tarutsü voter-tem’ ta shimteta lir. Tetezü, taküm voter-tem anogomong yagi lanurtem dak aketba tashi aser temeten indang jembiner. India nung yimten yimsüsürtem shimba election nung shilem agitsü asoshi tetsür aser tebur arishi küm terti ajunger ajak nem temeten agütsür. Senso ka taküm nung iba yimten temeten aser tashi anguba anogo nungiang nisungchi akümer aser yimten yimli yangerba nung shilem agitsüsa tain rongnung züngsemer. Aji oda, kodang asangur aser aiür chanu ka arishi küm 18 junger külen election nung vote agütsütsü mapang atonger, iba anogo nung jagi pa mesüra laji yimsüsür shimertem rongnung adener. Ibaji nisung ka asoshi tashi tulu, kechiyong chuba dang nungibo chuba shimertemang tashi tuluba lir. Iba tashi, temeten aser maongkaji meteta, talisa, tanü putu lanurtemi yimsüsür shimba election nung pei vote-ji pei temeten ta angateta shilem agitsübaji kanga tongtibang teinyaktsü mapa ka asütsü. Atangji, lanurtem aikati election nung vote agütsüi aotsübaji nüngdak mali amai bilemer, anungji tangari shimba yimsüsürtem kübok meteta aser memeteti takoksa aika ajurua aor. Alima ajungtsüba aser majungtsüba, nübortem jangratema alitsüba aser malitsüba,lanurtem mapa teinyaktsü ngua anisüngzüka alitsüba aser malitsüba ajak ya yimten yimsüsürtem dak keta lir, kechiyong parnoki dang maparen shia nung ozüng latettsü aser telemtetba agitsü. Aji oda, kodang itemji angatetdir senso ajaki election nung pei vote peii enoknütsü. Atangji, tanü asen lima nung election agiba yimya majungba agi lanurtem aikati election nung shilem agitsü mejangrar. Ano, lanurtem aika election anogo nung pei vote enoktsüi moutetter, kechiyong teloki nokdanger aser aoyonga tangari pa mesüra la vote enoktsür alir. Ibaji, talisa, lanurtem küm terti junger mezüng vote agütsütsü purtem asoshi tezüdangtsüka lir. Tanü asen lima jungnüseta majungbaji lanurtemi temulungjang temerük aser tiendang agi yimten aser lokti nung shilem aginüaka magitetba ajanga lir. Iba jagi lanurtem taküm ya tetenzük dang nungi raksadaktsür. Lanurtem pei vote enoktsütsü maongka sadema mangur, government mapai sen agi alia aitsüsa akümer aser mapai ili taintemi ochimashi mapa inyaktsü sayur. Item tatidangji mekokteti lanur tajungtem agi ochimashir aser tashiyim amshir taintem küma aor. Ibaji temulung ashitsüka lir. Aji oda, asenoki tesüiba anogo aser mapatemji toktsüdi saka tanü aser asüng asen lima ajungtsü asoshi lanurtem nem danga parnoki angatetba aser mulungba ama election nung shilem agitsü asoshi maongka sadema lapoktsüra, iba anogo nung jagi asen lima yanglu tenzüktsü. Aiür aser asangur chanu ka asoshi pa mesüra la küm terti junger electoral roll nung tenüng züluokbaji school nung tenüng züluokba dang nungi taoba aser tepelatiba anogo asütsü Joko, pai mesüra lai parnok asoshi MLA mesüra MP asütsü shimba nung shilem agitsü akoktsü, anungji election mapanga candidate ajaki pa mesüra laji akümtsübutsü aser election temer külena MLA mesüra MP jagi parnokji züngshitsü. Election nung vote enoktsübaji pei lima yangerba nung shilem agi tenzüker. Aji oda, asen vote agi yimsüsür tamajung aser metemsü ka shimtetra asenoksa akoksatsü saka ano asen vote agi yimsüsür tetemsü tajung ka shimtetra, repranga lia asen lima topur junga renloktsü aser nübortem yimjiyimjung nung alitsü. Tang tarutsü putu junga alitsüba aser malitsübaji tanü putu nungbo election agidang bendanger.Ibaji meteta lanurtemi kanga temulung agüja ochi mulung agi election nung shilem agitsüla. Atangji, lanurtem asoshi election nung shilem agitsübaji pei vote agi pei lima asoshi yimsüsür tetemsü tajung shimtsübaji dang masü saka pei lima aser nübortem asoshi taküm bendanga agüja inyaktsü tangatetba aser temulungtetba nung election-ia aitsüla.