VVIP Chopper ken o SC-i ketdangsüa bushitsüla: Congress

New Delhi, May 07 (Agencies): Tanü Congress Party-i Agusta Westland helicopter alidang tezüngzüktep agiba ken oji Supreme Court (SC)-i ketdangsüa  bushisüngdangtsüla, ta khangogo.
Lok Sabha nung o iba onük nung toktepdang Congress lenir, Jyotiraditya Scindia-i, “Tajemdakdak maliba nung tai metongoktsütsüla. Onoki asüngdangbatem telangzüba agüjang. Supreme Court-i ketdangsüa bushisüngdangtsüla aser iba osangji ita asem shia House nung metetdaktsütsüla,” ta ashi.
Tajemdakdak makai tai tongloktsübaji BJP yimya kümogo, parnoki osang tai prokner, ta Congress züngsemisa ashi.
“Ajisüaka onoki ibaji jungkai adokja linük aser iba House nung metetdaktsütsü atema azüngashiogo,” ta paisa ashi.
Atangji nungbo, iba tezüngzüktep ya 1999 küm NDA yimsüsüba mapang nung tenzük aser helicopter height metre 6000 nungi metre 4500 tashi alutsüji UPA sorkari masü saka 2003 küm NDA sorkari lemtet, ta Scindia-i ashi.
2003 December ita nung item telatetba melenshitsü aser metre 4500 dang akumtsü atema Prime Minister’s Office nungi shidi ka zülu, ta Congress MP-isa ashi.
2013 February ita nung UPA sorkari iba ken o ya CBI nem agütsü, aser anogo 12 tsüngda mezüng bushisüngdang ka benok, ta pai ashi.
“Ner sorkar ita 24 jungogo, ner sorkari anogo 720 nung kechi inyak (?) Nenoki senjang kabo bener arur asü (?) Ochimashi nung dena aliba nisung kata nenoki jangjar ma(?) ta pai asüngdang.
Paisa, company tem anentsüba mesüra blacklist-i yokbaji UPA sorkari tenzük, iba mapang nung Defence Minister-i AgustaWestland den tezüngzüktep magitsü ta lemtet. Sen crore 2,063 bener arubaji-a UPA sorkari bener aru, ta ashi.
Party Tir, Sonia Gandhi pusema Scindia-i, “Kodangsa Sonia Gandhi tenüng tetshidir parnok jashir aser tsübur, kechiyong la ya ‘keyi tetsü’ ka lir, ibayongji parnoki (BJP) la tsübur,” ta ashi.
Maneni Modi sorkar anema Scindia-i, “Küm ana nung parnoki item linüktem nungi telangzüba mengutet. Tezüngzüktep agiba nung ochimashi lir ta jembisangji ozü (taoba) Defence Minister lir, aser onoki ibaji bushisüngdangtsü,” ta ashi.
“Kechiba October 8, 2015 nü FIPB senden nung blacklist company, AgustaWestland nem temelaba agütsü (?) Iba ya langzüang. Kechiba Make in India sentong nung shilem agitsü  atema Finmeccanica jaok,” ta pai asüngdang.
“Ner party (BJP) Tiri iba ya taila company ta jembiogo aser nenoki Make in India sentong nung taila company ka jaok. Iba atema ya parnoki telangzüba agütsütsüla,” ta Congress züngsemisa ashi.
Iba sülen BJP nungi Anurag Thakur-i, Defence Minister-i onüktem jembiogo, süpokrem agirtem tenüng ajak jungkai adoktsü. Iba nung ya Tyagi’er kibong dang liasü asü,” ta ashi.
“Iba bushisüngdang nung Defence Minister-i mapang kobika agitsü. Ni metetner. Iba nung ya ochimashi dena lira bushisüngdangtsüla,” ta pai ashi.
Congress aija Thakur-i, party-i inyakyim ajak raksatsüogo aser ochimashi nung ajemoker, ta ashi.
Defence indang ochimashi ken o ajak nung Congress densema lir. “AgustaWestland tezüngzüktep nung shirnoksa densema lir. Kechiba company ji shim (?) ta pai asüngdang. Paisa, kechiba tezüngzüktep agitsü atema Italy nunger company shim (?) ta asüngdang.