VVPAT shilem 50 reprangra election osang anogo 6 agi menotsü: EC

New Delhi, March 30 (Agencies): Opposition party 21 nungi lenirtemi taruba Lok Sabha election nung assembly constituency shia nungi VVPAT slips tajemba agia shilem 50 bosa züngdanga reprangtsüla, ta mepishiba ashishia Election Commission (EC)-i, yamaji süra election agiba osang agütsütsü atema anogo 6 nü menotsü, ta metetdaktsü.
Election Commission-i, “Assembly Constituency aika nung polling station 400 dak tema lir, anungji VVPAT slips azüngtsü atema anogo 8-9 shi agitsü. VVPAT slips züngshitsüsa akumer, anungji nüngdakba mapang dang nungi taliba adoktsü,” ta metetdakttsü.
EC-isa, VVPAT slip taliba azüngtsü atema election ketdangsertem training tali agitsüla aser item ama ketdangsertem ano tali nüngdaktsü, ta ashi.
March 25 nü Supreme Court-i EC dang, assembly constituency shia nung VVPAT slips ano taliba azüngtsü atema opposition-i akhangba dak sendakba nung telangzüba agütsütsü asüngdang.
Election Commission-isa, “Election agitsübasa aser April 11, 2019 nungi election tenzüktsü, aser Election Commission of India-i benoka inyakba maparen nung tang temelenshi benoktsüji tapet masü,” ta metetdaktsü.
Commission-i kechiba vote azüngtsü atema VVPATs aser EVM den medemdangtsü atema tali mekümtsür, ta asüngdanga SC-i EC dang anogo asemnü tsüngda parnoki ajangshiba timtem metetdakjang, ta tuyua liasü.
SC judge temi maneni iba ken o ya April 1 nü angadangtsü, aser iba nungji Election Commission nungi ketdangser kati yariteptsü.
Opposition party 21-i taruba election nung voting machines den VVPAT shilem 50 bosa puteptsüla ta Supreme Court dang mepishiba ken o ya Chief Justice Gogoi-i aniba bench kati angadangdar.