Vyapam ken o bushisüngdangtsü asoshi CBI-i nisung 200 nüngdaker

New Delhi, July 20 (Agencies): Madhya Pradesh nung ochimashi ken o tulu dak sentakba Vyapam ochimashi ken o bushisüngdangtsü asoshi tajemba agi nisung 200 bo nüngdaker ta CBI-i shiogo.

Iba ken o nung ochimashi aser nisung 49 asüba dak sentakba nung tang tashi nung FIR 185 bo benokogo. CBI-i nisung tali nüngdakbaji Julu 24 nü ken o angadangba mapang Supreme Court nem metetdaktsütsü.

Osangbenertem den jembiba mapang Vyapam ken o bushisüngdanger CBI tongti ketdangser kati, “Iba ama bushisüngdang asoshi onoki ano nisung aika nüngdaker,” ta ashi.

Tang iba ken o ya CBI züngsem 40-i bushisüngdangdagi, aser parnok rongnung nisung ishika dang Bhopal nung amenoka lir.

Ketdangserisa ashiba agi, ano ketdangser 150-200 nüngdaker. Ajisüaka CBI nungisa ketdangser aika shimoktsüji tamakoktsü, kechiyong ibaji ajanga tanga ken o aika bushisüngdangba nung tamakok alutsü.

Iba ken o nung kaketshirtem, tsüraburtem, university ketdangsertem, Madhya Pradesh ketdangsertem, police ketdangsertem, forest ketdangsertem aser yimtenren lenirtem densema nisung 2,000 shi bushisüngdangtsü nüngdaker.

Ketdangserisa, iba ken o bushisüngdangtsü asoshi CBI nem bendanga agütsüba sülen ano nisung aikati parnok den tongtepa ken o tasen benokdagi, ta metetdaktsü.