Vyapam ken o bushisüngdangtsü SC-i CBI nem nungloktsüogo

New Delhi, July 09 (Agencies): Madhya Pradesh nung Vyapam ochimashi ken o aser iba dak sentakba nung nisung 45 asüba kuli bushisüngdangtsü asoshi tanü Supreme Court (SC)-i Central Bureau of Investigation (CBI) nem nungloktsüogo.
MP sorkari iba ken o bushisüngdangtsü asoshi CBI nem bendanga agüjang ta mepishiogo ta Attorney General (AG) Mukul Rohatgi-i court nung metetdaktsüba sülen, Chief Justice HL Dattu-i aniba SC-i iba ken o bushisüngdangtsü atema CBI nem nungloktsüogo.
“AG-i metetdaktsüba nung ashiba agi, Vyapam ochimashi ken o aser iba dak sentakba nung nisung asüba ken otem kecha tebendang makai tajungtiba nung bushisüngdangtettsü asoshi CBI nem agütsüba nungji Madhya Pradesh sorkari kecha ashishia mali,” ta court-i ashi.
“Onoki AG tangatetba pela agizüker. Iba tangatetba nung ajemdaker Hombar nü nungi tenzüka Vyapam ken o aser iba dak sentakba ken o nung nisung asüba bushisüngdangtsü asoshi onoki CBI nem bendanga agütsür,” ta court-i ashi.
Forest guard shimba ochimashi ken o nung State Angh densema aliba aser pai tim masüba nung pa menden amshiba anema FIR benoka aliba MP High Court-i agienba asoshi SC-i ibaji anema benokba shidi ka MP sorkar aser state angh, Ram Naresh Yadav na nem agütsüogo.