Vyapam ken o ketdanger ka asüba bushisüngdang tenzükogo

Bhubaneswar, October 21 (Agencies): Madhya Paradesh nung Vyapam ken o bushisüngdanger, Bijaya Bahadur Singh Odisha nung ajungbena asüba ken o bushisüngdang tenzüka Mongolbar nü CBI telok kati Odisha Railway ketdangsertem dang asüngdangyaogo.

Belpar Railway Station, station master N Pradhan-i, “Tasümangji kong angu, iba coach nung ticket collector ji shiba liasü, asürji mozükidangi idangyongjisa anir ao asü mao aser iba tatalokbaji nenoki kodaser metet, ta parnoki (CBI) onok dang tasüngdangba aika asüngdangogo,” ta ashi.

Singh tasümangji October 15 anepongi Odisha nung aliba trian lemang ka nung angu. 1978 batch retired IFS officer Singh ji Puri-Jodhpur Express train nung ainlen tesenzütak liasü aser pa train nungjagi tsük ta osang lir.

Pa den kinüngtsü Nita Singh aser jala nungerji Bhopal-i meyipa aruba mapang pa sama, iba sülen pa kinüngtsüi Bilaspur nung FIR ka benoka liasü.

Bhubaneshwar nung aliba CBI office-ibo Singh asüba dak sentakba nung CBI telok ka Jharsuguda-i aoba indang kecha shia mali.

2010-2013 küm tashi Singh ya Madhya Pradesh Professional Examination Board (MPPEB) mesüra Vyapam ta ajaba committee balala aika nung shima liasü. Item committee nung pa Observer inyaka liasü.

Iba ken o nung tetendangba ana atema Observer Singh tasümangji October 15, 2015 nü Jharsuguda nung aliba train lenmang ka nung angu, ta police-i metetdakja liasü.

Vyapam ochimashi ken o ya Madhya Pradesh nung kaket rejutemm nung admission agitsü aser sorkar mapa nung shimokba nung ochimashi adokba ken o lir, aser iba ochimashi ken o nung ya yimtenren lenirtem aser sorkar ketdangsertem aika densema lir.

Taküm July ita nung Supreme Court-i Vyapam ken o bushisüngdangtsü atema CBI nem agütsüogo. Iba ken o dak sentakba nung aibelena alir aser kuli agütsür densema nisung 40 dak tema masütsü yimya nung süogo.

Supreme Court-i iba ken o ya CBI nem agütsüba sülenbo iba ken o dak sentakba nung ajungbena nisung asüba kkanga ajemogo..