Vyapam ken o: Nisung 70-i asütsü atema Tir dang mepishi

New Delhi/Bhopal, August 08 (Agencies): Madhya Pradesh Professional Examination koba dang ‘Vyapam’ ta ajar, iba ochimashi ken o nung aija Gwalior Jail nung puoka alir nisung 70-i Tir Pranab Mukherjee dang, parnok soseta asütsü atema temelaba agüjang, ta shidi züluogo, ta osang ka ajanga ashi.
Vyapam ochimashi ken o dak sentakba nung nisung 49 süogo.
Taküm July ita nung Madhya Pradesh, Gajra Raja Medical College nungi Vyapam ken o nung tai tonglokja alir kaketshir pongu- Amit Chadha, Manish Gupta, Vikash Gupta, Raghavendra Bhadauria aser Pankaj Bansal nungeria Tir dang parnok asütsü temelaba meshia liasü, kechiyong iba ken o nung parnoki aibelenba kuli monguteti police-i chiokba sülen parnoki lendong ajurutsü tsübua liasü.
Iba ken o nung osangzülur Akshay Singh-i bushisüngdangba mapang asüba sülen opposition party temi MP nung Shivraj Singh Chouhan-i aniba BJP sorkar anema noktakdagi.
Iba ken o anema ola adoker arishi küm 26 Ashish Chaturvedi-i, pa taküm lendong tulu nung lir ta ashiba den külemi iba ken o nung Shivraj Singh Chouhan-i shilem agia lir ta pai aitsüogo, aser ibaji ajanga pa taküm amokmerendagi.

Ano iba ken o anema ola adoker arishi küm 36 Prashant Pandey-ia taoba ita, “Bhopal SSP kidangi arur ni amokmerenogo. Ni iba ken o nung Chief minister tenüng tetshira pai ni anema ken o 40 benoktsü ta shiogo,” ta ashi.

Kasa ken o anema ola adoker Dr Anand Rai-ia, “Aibelener tongti rongnung ka, Jagdish Sagar-i kü dang phone ajanga, pai kü taküm agitsü ta amokmerenogo. Ni High Court ajuruba sülen ang kü nem security agütsü, saka ibaji ghonda ti (8) atema dang. Koba tetezü,  anüngdang 11:00 ako matongdang aser aonung 7:00 ako sülenbo kü security ji Tsüngrem ket nung dang lir,” ta ashi.

Madhya Pradesh Professional Examination Board mesüra ‘Vyapam’ ta ajaba tentet ajanga kaket rejutem nung admission agitsü asoshi shimba den sorkar mapa balala nung inyaktsü atema tadidang acha-ayanga agir, iba  maparen nung ochimashi tulu adokba ken o ya Supreme Court tetuyuba nung CBI-i tang bushisüngdang tagitak lir.