Vyapam ken o nung CBI-i MP Chief Secy ajuru

New Delhi, July 14 (Agencies): Madhya Pradesh nung Vyapam ochimashi ken o bushisüngdangba CBI team-i tanü Madhya Pradesh Chief Secretary Anthony JC de Sa aser DGP Surendra Sinh na ajurua iba ken o bushisüngdangba nung yariteptsü asoshi o lemtepogo.

CBI osang ajanga ashiba agi, Joint Director R P Agarwal den senior ketdangser nati state nung tongti ketdangser anaji ajura senden amen.

Linük nung iba ochimashi ken o tulu bushisüngdangtsü atema MP sorkar nungi nüngdaka aliba teyari nüngdaktsü.

Bushisüngdangba ajungaji Bhopal tiyongtsü ser agitsü.

Yashi nungi tenzüka Joint Director R P Agarwal lenisüba nung CBI züngsem 40-i akümba team kati iba ken o bushisüngdang tenzüka state police Special Task Force tongti Sudhir Sahi den o lemtep kaogo.

Vyapam ken o aser iba dak sentakba nung nisung 40 dak tema asüba ken otem CBI nem bushisüngdangdaktsütsü asoshi Julu 9 nü Supreme Court bench nungi Chief Justice H L Dattu-i tuyua liasü.