Vyapam ken o nung nisung 34 süogo: Centre Sorkar

New Delhi, August 05 (Agencies): Madhya Pradesh nung Vyapam ochimashi ken o dak sentakba nung tang tashi nung nisung 34 süogo, ta tanü sorkari Rajya Sabha senden nung metetdaktsü.

Minister of State for Home Haribhai Parathibhai Chaudhary-i, Madhya Pradesh sorkar osang nung ajemdaker 2007 küm nungi 2015 küm tashi nung Vyapam ochimashi ken o dak sentakba nung nisung 34 süogo, ta ashi.

Tezüluba nung tasüngdangba ka langzüdang minister-i, “Item rongnung nisung 11 lendong ajanga asü, nisung 15 temang manemba kuli ajanga asü, nisung pongu soseta asü, nisung ana tzü nung arakseta asü aser nisung ka asüba kulibo mejangjar, ta ashi.

Madhya Pradesh Professional Examination Board (MPPEB) mesüra ‘Vyapam’ ta ajaba ochimashi ken o ya tang CBI-i bushisüngdangdagi. Kaket reju balala nung azüngtsü asoshi tatidang agiba aser mapa balala nung shimoktsü asoshi ketdangsüba tentet Vyapam ken o ya CBI nem bushisüngdangdaktsütsü asoshi July ita nung Supreme Court-i tetuyuba agüja liasü.

Iba sülen züngsem 40-i akümba Central Bureau of Investigation (CBI) team ka July 13 nü Bhopal tonga aruba sülen iba ken o bushisüngdang tenzükogo.

Parnoki Madhya Pradesh police ketdangsertem aser Madhya Pradesh High Court-i shimba Special Investigating Team (SIT) den iba ken o dak sentakba nung olemtep kaa liasü.

Iba ken o nung nisung 2,100 shi puogo aser tai tonglokja aliba nisung 491 shi jenshia senzüdagi.