Vyapam ken o: Taoba minister minister Laxmikant Sharma chiok

Bhopal, December 20 (Agencies) : Deobarnü taoba Madhya Pradesh minister Laxmikant Sharma Central Jail nungi chiok.
Pa ya Vyapam ken o nung aija tepuokdak yua liasü aser ken o tenet nung bail temelaba agütsüba pa chiok.
Taoba ita 19 tashi Sharma tepuokdak yua liasü aser tanü teinyaktsü mapatem tembangba sülen pa chiok.
“Ni okadak tamang akar aser ni mapang tamajung ajurudang kü den yariteper ajak dang pelar” ta Sharma-i osangbener dang ashi.
Taoba state Education Minister pusema nungiter nisung aika tanü Central Jail kima nung adenshia pa pela agizük. Sharma chiokba sülen pai tekülem ki anati oa külem aser idak nung jagi tetsü’er kidangi ao.
December 18, 2015 nü High Court nung division bench kati Vyapam-i ketdangsüa agiba 2012 police constable recruitment test nungi Sharma nem bail temelaba agütsü. Iba division bench nung Chief Justice AM Khanwilkar aser Justice KK Trivedi na dena liasü.
Sharma-i sen lakh 5 personal bond agütsüba sülen pa bail nung chioktsü akok ta oshidang agüja liasü. Pa anema ken o tenet tashi liasü aser item ajak nung pa bail temelaba angu.