Vyapam ochimashi ken o atema Opposition-i Modi aitsür

New Delhi, July 05 (Agencies): Madhya Pradesh nung Vyapam ochimashi ken o dak sentakba nung Ato kilonser Narendra Modi-i ola madokba atema opposition-i aija tasüngdangba kaogo.

Vyapam ken o dak sentakba nung tesüiba küm ana tsüngda nisung 40 dak tema süogo aser iba ken o ya tamajungba kümdagi.

Sen crore aika nung ochimashi ken o ya Central Bureau of Investigation-i bushisüngdangtsüla ta Congress-i takhangba agüja arur. Iba ken o tulu nung ajemdaker Chief Minister Shivraj Singh Chouhan menden nungi alutsüla ta opposition-i akhanger.

Vyapam ken o nung kulisertem aser aija alir nisung jenti mejangjatetba kuli ajanga asüba ajanga iba ya yimtenren nung mangatettep ken o tulu ka kümogo.

Nisung asüba shia ken o ji bushisüngdangtsü ta shia state CM, Chouhan-i, “CBI-i bushisüngdangtsü asoshi akhangbaji High Court-i magizük aser parnok sasa iba ken o asoshi inyakdar,” ta ashi.

Congress MP Jyotiraditya Scindia-i, “Iba ken o dak sentakba nung nisung asüba kuli ajunga independent agency kati junga bushisüngdangtsü onoki akhanger,” ta ashi.

Iba ken o nung kechiba CBI-i bushisüngdangtsü meteyu (?) ta asüngdangba langzüdang Congress general secretary Digvijaya Singh-i, “Koma ser temang anema alir ka ajungbena asür (?) Akshay ya temang anema liasü, pa temelungjang tashitak meliasü. New Delhi nung aliba AIIMS nung post-mortem agitsüla. Ken o ajak CBI nem bushisüngdangdaktsütsü asoshi BJP-i akhanger, süra kechiba iba ken o asoshibo parnoki makhanger,” ta ashi.

AAP-ia iba ken o nung kasa takhangba agütsüdagi.

Iba ken o nung osangbener Akshay Singh asüba sülen Deobar nüa iba ken o nung aibelen tonglokja alir kar den tesentaktep lir ta melung melemteti alisang aser Jabalpur nung aliba medical college dean tasümang hotel ka nung nguogo.

Madhya Pradesh Professional Examination Board (MPPEB) ochimashi ken o ya state-i ketdangsüba medical college tem nung admission inyakyim aser sorkar mapa agütsüba dak sentaka lir.

Medical aser engineering course atema admission asoshi MPPEB ajanga entrance test agiba den sorkar mapa balala asoshi tatidang agir.

Iba board nung ochimashir ketdangsertemi admission agitsü aser mapa nung anioktsü asoshi senotsü agir ta tai tonglokja lir.