W. Honje Konyak-i Mon nung Wahan Vegetable Market semzüktsü

Dimapur, Sept. 08 (TYO): Sept. 07, 2017 nü Mon Deputy Commissioner, W. Honje Konyak-i Mon nung Wahan Vegetable Market semzüktsü.
Iba sentong nung jembidang Honje Konyak-i, iba market tesem ya mamshie aliba tesem ka liasü, aser nüburtem teyaritep ajanga market amenokogo, ta metetdaktsü.
Iba market yanglutsü atema sorkar nungi senotsü teyari maliasü, saka temelunger kari senotsü tenlatepa yangluogo, ta paisa metetdaktsü.
Shishilembar aser shishirtem dang market tesem merükteta ayutsü mepishia pai Mon Town Council danga aibelenertem nem temerenshi agütsütsü metetdaktsüba den külemi sorkar dang nungi teyari meimlai tanüngba mapatem renema inyaktsü ayongzük.
Iba mapa ya DC, W. Honje Konyak-i apiteta liasü aser market meyangluzük tashi pa leniba nung inyak.
Iba market semzükba sentong ya ADC, Mon, Shanavas. C, IAS leniba nung agi, aser SDO (C), Phomching, Ilika Zhimomi-i lokti pelaa agizükba o jembi.
Sentong nungsa melungtet telok balala nungia o jembia liasü.