Wabong T. Sentichuba alima nungi pilaogo

Dimapur, November 25 (TYO) : Taoksatsüka, Nagaland nung taoba minister tebu tedi Wb.T.Sentichuba tanü nikongtsütsü ajungbena alima nungi pilaogo. Pa arishi küm 80 liasü.
Asür T.Sentichuba ya Nagaland tatar senden nung 1969 küm nungi 2008 election tashi nung Angetyongpang Assembly Constituency nungi tenetben tashi adoka yimsü asüba yimten lenir tajung ka liasü. Pa kaketshir asüba mapang nungi lokti aser nübor meima tenzükba lenir ka liasü.
Pa den asü pila sentep sentong Brehostibar nü anüngdang 11:00 ako nung par kidang Diphupar ‘B’ nung alitsü aser iba sülen pa mang par tetsü taso lima Mongsenyimti-i bener oa yangji aremtsü.
Wb.T.Sentichuba ajungbena asüba osang angashia kanga aoksar aser asür kinungertem den mangyim jashi lemsateper ta National Highways, Mechanical & Election kilonser, Wb.Nuklutoshii metetdaktsüogo.
Pa ya yimten nung takok ngua inyakba yimsüsür ka liasü. Pai inyakba mapatemji tarutsü lanurtem asoshi rongsen aser tashi angudak asütsü. Pa ama ka asübaji Naga nunger ajak asoshi takoksa lir ta kilonserisa metetdaktsü.
Ao Kaketshir Mungdang (AKM) tir L. Jemti Longchar-ia AKM tenüng nung sangdong ka nung asür T Sentichuba Jamir asüba osang angashia aoksaba aser asür kibong den asüku lemsatepba osang metetdaktsü.
Asür T Sentichuba Jamir-i AKM nung tir 21 buba inyak. Pai 1964-65 kümsük nung AKM Tatong Tir aser 1965-67 kümsük nung Tir inyak, ta AKM tirisa sangdong nung shia lir.
Asür T.Sentichuba ya Bodbar anepdang tashi shitak dang liasü saka anüngdang ajungbena ka temang meshitaki aküm, anungji idangjisa mozü kidangi bener ao saka mekümzükteti pa arishi yangji tembang.