Wales telok Euro 2016 semifinal-i iogo

Belgium telok madak goal 3-1 agi takok ngua tang tasayadak Euro 2016 semifinal asayatsü jenjang anguba sülen Gareth Bale, Neil Taylor aser Joe Allen nungeri külem Wales asayartem den pelatepba noksa nung angur. (Lille, July 02)

Lille, July 02 (Agencies): Wales teloki goal 3-1 agi Belgium telok madak takok ngua tang tasaydak Euro 2016 semifinal asayatsü jenjang yashi, Hokolbar nü ajangzükogo.
Tanü asaya tenzüker minute 13 buba nung Radja Nainggolan-i yard 30 talang nungi goal takok ngua agüja par Belgium telok temaba jenjang nung ajungkettsü.
Ajisüaka, Ashley Williams-i külem asayar, Ramsey-i metsüoktsüba corner ball agizüka pa tekolak agi par Wales telok asoshi goal agütsüba ajanga par telok anaprongla kasa jenjang aküm.
Tesülen, Hal Robson-i Ramsey-i yanglutsüba cross ball agizüka, Wales asayar, Thomas Meunier, Fellaini aser Jason Denayer nunger ajangdanga ball bener aluba sülen par Wales telok asoshi 2 buba goal takok ngua agüja Wales telok goal 2-1 agi temaba jenjang kümdaktsü.
Yamaji asayar külen, substitute asayar, Sam Vokes-i Gunter-i yanglutsüba cross ball agizüka pa tekolak agi 3 buba aser takokba goal tongoktsüba ajanga par Wales teloki goal 3-1 agi yashi asayaji kokadok.
Tan takok anguba sülen Gareth Bale densemba Wales teloki Cristiano Ronaldo’er Portugal telok den Lyon yimti nung taruba Bodbar nü semifinal asayatsü lemzükogo.
Tan takok anguba ya Wales teloki tesüiba mapang, 1958 küm World Cup quarterfinal-i aiba sülenbo tan mezüngsüa tongti asayamong semifinal nung shilem agitsü jenjang angur lir.