Wall Street nung International Women’s Day tenüng nung ‘Fearless Girl’ süngyanglu semzük

March 09, 2017 : New York nung tetsür kati “Fearless Girl” süngyanglu anasa  iba süngyanglu nokdakba yimya nung nokdaker tangoba noksa ka yangi angur. Iba süngyanglu ya ‘Street Global Advisors’ teloki International Women’s Day nüngtem nung yangluba lir.

New York, March 09 (Agencies): New York, Wall Street nung kanga nüngtugu ‘Charging Bull’ süngyanglu anasa tetsür chanu süngyanglu tasen ka International Women’s Day tenüng nung yangluogo. Iba süngyanglu tasenba ya kanga tasü tait aser lai ‘Charging Bull’ süngyanglu dak tenük rangloker yanglua lir.
Boston nung senotsü amshiba telok, State Street Global Advisors ajanga company balala nung tetsürtem tanishir tali shimtsü ajungshia iba süngyanglu tasenba ya yanglu.
Iba ‘Fearless Girl’ süngyanglu ya Kristen Visbal-i yanglu aser New York nung iba tesem ya kanga tongtibang kümogo.
Iba tetsürla süngyanglu ya yongmen yin agi yanglu aser la teka anaprong-i la teperem nung nemeta yanglua lir.
“Lenisüba nung tetsürtem tashi metetang. Lai temelenshi balaka agütsür,” ta o zülur la tetsüng anasa lir.
“Rongsen trillion $2.5 jungnüa nung tanishir ka asünung, tajangzük tajung angutsü asoshi maparen balala nung shilem aginür. Aser iba temelenshi balala bener arutsü asoshi ketdangser jenjang balala nungi shimba ajanga takok angur,” ta State Street indang deputy global chief, Lori Heinel-i ashi.
US nung company balala indang asadangba telok, ‘Russell 3000’ ajanga ashiba agi linük nung company balala shilem 25 nung tetsürtem ketdangsür mali.
State Street nung ‘board member’ 11 aliba nung tetsür asem lir. “Great Britain aser Australia nunga iba company nung tetsürtem züngsem tali shimoktsü asoshi ajungshitsü,” ta Heinel-i ashi.
Bowling Green Park nung yongmen yin agi yanglua aliba ‘Charging Bull’ ya temelaba melii 1989 küm ayaterm nung amenloktsü. 1987 küm America nunger shishilembaba nung takoksa nguaka parnoki tanaben nokdaktetba nüngtem nung iba süngyanglu ya yanglu.
Tetsürla süngyanglu ya McCann New York ajanga hopta ka ayutsü asoshi yimti nung ketdangsürtem dang temelaba agir inok, saka tang iba süngyanglu tasenba ya meindoki ayutsü asoshi maparen balala inyaktepdar.