Walokwatem mesüra tesendaktep ?

Aser shinga mesenzüba lima aser nisung shinga malidak, Ijip nungi onok anitetba Kibubaji kong lir ta parnoki tashia mashi. Yeremia 2:6.
Khristan yimsü Yisu Khrista den kanga anasatepa aliba aser Pa den tesendaktep nung ainba lir. Iba yimya süpaa amshitsüba tamang tesayuba ka masü mesüra temenen paitokba masü. Tsüngremi tenyaba mapa ajakji Pa temeim Pa nüburtem den lidaktsütsü atema lir.
Tsüngremi tekülemji asenoki Pa sentsüwangshi ngudaktsütsü aser Pa den apet asenok nungi telangzüba angutsü asoshi tentet, kechiaser aikati ibai yimya süpaba mapa ka, tekülem sentep nung ken atentsüba yimsü ka dang kümdaktsü. Tekülem sentepi aobaji Tsüngrem sentsüwangshia pa den ajuruteptsü nükjitong nung masü saka tekülem sentep nung metenra tangari tamanger masü ta ashitsü tsübuba agi aor aser atener. Tsüngremi tenla agütsüba yimyaji asenoki Pa nüburi, asenoki Pa dang meimba ajunga sayudaktsütsü asoshi tentet; saka aiben asenoki Pa mesüzükba aser asenok aibelenba Pa ain adokba ajema kümdaktsütsü tangatetba nung inyaker. Asenoki Tsüngrem den sensaksemtettsü asoshi Pai asenok dang sarasademtsü sayu, saka aiben asenoki ibai sarasadem ajanga raksar “sarasademer” aser asen Tebu mulungjang nung kechi bilema lir aji mangai aritepa toktsür aor. Tsüngremi shirnok meimer parnok kümzüktsü asoshi ozüngji tenteta ayu, saka ibai Tebu den tesendaktep yangluba lemang masü ozüngyim lemang kaang kümdaktsü. Tamajung nungi kümzükdak lemang masü saka temerenshi agütsüba lemang ka kümdaktsü.
Tsüngrem den telungjem nungi pilar tamangba yimsü mapatemji tazüngla walokwatemba lir. Yeremia mapang nung nüburtemi Tsüngrem meteni walokwatemba nung temulung süa liasü. Parnok yimsü nung parnoki temulung lema liasü aser parnok den Tsüngrem matenba parnoki memetetti liasü. Tsüngrem meteni sarasademtsü, tekülem nung atentsü mesüra tenla agütsütsü takoktsü asü? Atangji ibai takoktsü! Khristan aika asoshi ibaji tesasatsü mapa lir. Yisu Khrista den tesendaktep makai yimsü nisung ka tesü. Kodang Tsüngrem dena lidir tepilaji tejangja asütsü.