Walunir Mahatma Gandhi-i arok nubor bilemja jembi

~L. Repa Lkr, Midan Peyu,  Ao Region.

Tulur nisungtem aser takotet nisungtembo parnok atema yongmein yin aser sentilong agi nüngo yanglur. Saka Tsüngrem milak agi semshir rogobo par taküm piyong nüburtem millionsa million mulungjangi agizüktettsüsa ayuba kulitem teperi kar.
Mahatma Gandhi-i Naga nunger dang nangzükba :
1947 nung Naga nunger teshimtetpurtem India limai ao aser parnok jagi New Delhi (Bhangi Colony) nung 19th July 1947 nung Mahatma Gandhi par talidak kidang ajuru. Naga nunger teshimtetpur jagi Mahatma Gandhi indang tongti zülur Hyarala ajanga Naga nunger bilemba zülur yamai agütsü, “Naga nungerji India nunger masü aser Nagaland ya India nunger litsü nung mali. Aser Naga nungertemi kodangsa India nungeri makdir idangji parnokia pei linük kümzüktsü atema nisung kati metembang tashi raratsü”. O lemtepba mapang nung Mahatma Gandhi ajanga temulung sadoksadoka odia dang yamai ashi, “Onoki British nunger yimsüsüba maginer aser parnoka olanglangsa. Nenoki nenok India nunger masü aser ner lima India nunger meyong masü ta shirabangla maparenji yangji tembanger, shingai nenok India telongjem nung kangshia denang ta mashitsü.”
Naga nunger teshimtetpuri kodang pa dang Naga nunger Independent anogoji August ita 15 nü nung sangdongtsü ta ashidang, Indiajia Mahatma Gandhi-i yamai ashi. Kechiba August 15 nü tashi atatsü?Kechiba tanüsa mesangdonger? Saka Naga nunger teshimtet rogo jagi Mahatma Gandhi dang ibai dena shisem. Kodang Naga nunger Independent kümdir idangji India nungeri Nagaland amaktsü Mahatma Gandhi jashia adok aser pai parnok dang asüngdanga ashi, nenoki kü dang tamang makar no? Lai (India-i) yamaji inyaktsüji khenyongi temeten mali, parnoki (India-i) tashiyim amshia makra ni kü taküm nenok (Naga nunger) asoshi tenla agütsütsü. Aser parnok (India) dang Naga nunger mekasetdang ni tama tepsetang ta ashitsü.

Wb. P. Alem Jamir-i züluba kaket “Ao oshi ojangru” – Homonyms in Ao language, (Words with multiple meanings) züngdangogo aser iba kaket nungi tajangzük anguba kar nuburtem dena lemsateper. Asen Ao oshi nung zülumen kasa süaka tetezü balala agütsüba ojang aika lir, aser itemji olasü nemzüka lua adokba (low tone), indang-indanga adokba (middle tone) aser azükleni saaketa adokba (high tone) ajanga tang tetezü balala-ji bendanga angatetba ojang merijang dak alia bushitet-a bendena züluogo. Iba kaket ya tongtipangsa school, college & university student-tem shirnoki Ao oshi agitsü jangrar parnok asoshi kangasa tongtipangsa asütsü, kechiaser iba kaket ya Dictionary & Guide book lir. Ano asen oshi mesamai wazuka ayutsü asoshi iba ya senti rongsen kaket ka lir, kechiaser iba kaket nung tezüludangbo spelling kasa tang zülur saka jembidangbo tetezü balalaangateter ta asüba aika bendena züluogo. Asenoki teti bangpettsü amai asen Ao oshi ya sensaker ta tembir, saka kodang ni iba kaket azüng, asen Ao oshi ya English oshi tang nungia takartiba oshia ta kuli tejangja nguogo. Asen Ao kin senso ajaki kaket zülur tang kangasa peladi.

– L. Kika Pongener.