Wangchuk apuba dak sendakba nung SC-i Centre dang telangzüba meshir

October 06, 2025 nü New Delhi nung climate activist Sonam Wangchuk kinüngtsü, Gitanjali Angmo den advocates- Kapil Sibal (abelen), Vivek Tankha (ajichilen nungi tanabuba) aser Sarvam Ritam Khare (ajichi) nunger tangokba noksa nung angur. Gitanjali-i pa kinüngbu chioktsü mepishia Supreme Court nung ken o benokba sülen Supreme Court-i Centre aser Union Territory of Ladakh na dang telangzüba agüjang ta tuyuogo.

New Delhi, Mongputeni/October 06 (Agencies): Tawa Ladakh nung nüburtemi longkak sashia aitba sülen climate activist, Sonam Wangchuk apuba anema pa kinüngtsü, Gitanjali J Angmo-i Supreme Court nem temepishiba ken o ka agütsüba nung ajemdaker Hombarnü SC-i Centre sorkar aser Ladakh Union Territory (UT) sorkar naprongla dang telangzüba agüjang, ta tuyuogo.

National Security Act (NSA) kübok Wangchuk pua lir aser pa tangsa chioktsü atema pa kinüngtsüi SC nem temepishiba ken o agütsü.

Bar and Bench-i ashiba agi, sorkar tenüng nung ken o jembir Solicitor General (SG) Tushar Mehta-i, ozüng nung ajemdaker Wangchuk apu, ta metetdakja liasü.

Ajisüaka Justices- Aravind Kumar aser NV Anjaria nati akümba bench-i Wangchuk kinüngtsüi benokba ken o dak sendakba nung oshidang kecha magütsü ajisüaka iba ken o ya maneni October 14 nü angadangtsü.

Supreme Court-i Centre nem notice agütsüba dak sendakba nung Wangchuk kinüngtsüi, lai SC dang pelar aser lai Jodhpur-i oa Sonam Wangchuk ajurutsü, ta metetdaktsü.

Laisa social media ajanga, “Ochi temeden angutsüsa ni linük temzüng, judiciary aser India nung nüburtem dak tamang katetter,” ta metetdaktsü.

Ladakh yimtiba, Leh nung lanurtemi state jenjang aser India temzüng kübok 6th Schedule nung züngoktsü atema takhangba agüja longkak aitba sülen anogo ana lir September 26 nü Wangchuk apu, iba sülen pa Rajasthan kübok Jodhpur-i anir oa jail ka nung puoka lir.

Ketdangsertemi ashiba agi, longkak aitdang rara adoktsü atema Sonam Wangchuk-i lanurtem ajungshia liasü.

Pa apuba sülen pa kinüngtsü Gitanjali Angmo-i linük Tir, Droupadi Murmu danga pa chioktsü atema tiyongtsüi aita inyakdaktsüner, ta mepishiogo.

Gitanjali ya Himalayan Institute of Alternatives Ladakh (HIAL) nunga CEO lir. September 24 nü Ladakh nung longkak aitdang nisung pezü asüba den aika yiruba sülen Ladakh nung alirtem anema inyakba atema lai Centre sorkar aser police-a aitsüogo.