WannaCry Attack ya Cyber Security Firm tem atema shishilembaba tsütsü tajangzük lir

San Francisco, May 20 (Agencies): UK nung amenloker aliba cyber security firm Sophos Group Plc nung chief executive, Kris Hagerman atema taoba hopta mapang tamajung ka süla. WannaCry “ransomware” ajanga parnoki achaayangba Britain National Health Service kar kongshia liasü koba ajanga surgery athiba dang masü ambulance tema meyipa yoka liasü. Iba sülen company-i parnok indang website nung “NHS ya Sophos ajanga kümzüka lir” ta inokja aliba olen indokadok. Industry aika nung iba amala tetsükdangtsü ajanga company tenüng menentsüla.
Aji saka Hombarnü, malware attack putetba sülen anogo 3 lir külen Sophos indang stock shilem 7 agi timba aküm aser ano company-i parnok indang ‘financial forecasts’ ajungketba sülen Bodhbarnü tali aküm.
Mongintemi iba amala timtem ajanga ‘cyber security’ industry tem tamakok anguba sayur ta shiaka ‘cyber security firms’ tem aika atema iba amala ‘cyber attack’ ya shishilembaba tsütsü tajangzük lir.
“Nisungtemi onok dang kodaser nenoki ‘cyber crime’ tebilemtsütem mazüokteter” ta asüngdanger aser ibaji nisung küm meyirejang aika lia arudar saka kodaser ozüng alema inyakba maparentem mazüokteter ta asüngdangba den kasa lir,” ta Hagerman-i iba hopta interview ka nung ashi.
Hagerman-i ashiba agi, par company ajanga NHS nung shilem 60 dang tekümzükba agütsür aser tanungba shilem tem nung timtem aliba ajanga iba timtem atalok.
Medical device mapang talangka amshia aruba tem nung kümzüka maliba osang meyirejang aika lir, ta Josh cyber security industry veteran Corman-i ashi aser U.S. medical institution shilem 85 shi nungbo basic cybersecurity tasks; software yanglushitsüba, lendong asadangtsüba aser network tem ka nungi ka piladaktsütsü asoshi tangazükba shidak aliba tamshirtem mali, ta paisa shisem.
Digital technology ainba den külemi cyber security dak sendakba nung tebilemtsütem aika adoktsü, anungji mozüki tem nung nurse ka ana talila aniokba dang nungibo ‘cyber security’ dak sendakba nung tangazükba tajung ngur alirtem mapa nung anioktsü nüngdaker.