WAPO-i Gayatri nem lenmang yangludaktsütsü mulunger

Kohima, Oct.13 (TYO) : Tang Dimapur aser Kohima na tsüngda lenmang National Highway 29 ulushia yanglutsü asoshi India sorkar kübok Ministry of Roads, Transport & Highways-i M/s Gayatri Projects Limited nem mapa agüja alibaji shingaia menokdangi inyakdaktsütsüla ta Angami Public Organization (WAPO) teloki metetdaktsüogo.
M/S.Gayatri teloki iba lenmang yanglutsü asoshi mapa agizüka lir saka parnoki Nagaland nung tamalen agizükba lenmangtem kar merenemteti tokja aliba agi item mapatemji tama renemtsüla ta Nagaland Contractors’ & Suppliers” Union-i metetdakja lir.
Ajisüaka, tanü Brehostibar nü WAPO kübok aliba lokti tentettem aser yimtsüng shia nungi yimten yimsüsürtem adenshia Sechü-Zubza nung senden alidang, parnokibo National Highway 29 nung lenmang ulushia four lane yanglutsü atema M/s Gayatri Projects Limited nem Ministry of Roads, Transport & Highways, Government of India-i agütsübaji agizüker, anungji parnok nem kecha timtem tenokdangba melii mapaji inyakdaktsütsüla ta lemtet.
National Highway 29 ya WAPO lushi nung lir, ibayongji parnoki khuretsa bilema iba telemtetba agiogo. Iba denji külemi parnokiksa M/s Gayatri Projects Limited teloki latetja aliba mapang shitak nung mapa shitak renemtsüla ta metetdaktsüogo.
Iba mapa takok ngua inyaktsü asoshi akok tashi nungita yaritsü aser kari danga timtem agütsüra ibajibo parnoki reprangtsü ta WAPO telokisa metetdaktsü.
Dimapur aser Kohima na tsüngda lenmang ya Naga nunger asoshi kanga tongtibang lenmang ka asünungji, ajaki temulung agüja repranga inyakdaktsütsüla aser yariteptsüla ta WAPO-i mepishia metetdaktsüogo.