Ward 21 Welfare Committee ajanga DALT dang pelar

Dimapur, Aami/June 09 (TYO): Dimapur Ao Lanur Telungjem (DALT) ajanga nüburtem asoshi mapa tajung inyakba atema pelaba lemsateper, ta Notun Bosti Colony Council, Middle Point Colony Council, Churches Colony Council aser Nyamo Lotha Colony Council tenüng nung Ward 21 Welfare Committee ajanga sangdong ka nung ashi.

DALT ajanga nüburtem asoshi mapa tajung inyaka streetlights inoktsü aser DC Courr Junction nungi Tajen Ao Road tashi lenmang ajunga yanglushia liasü.

DALT ajanga iba mapa tajung ana inyakba yagi tarutsü nung yimti nung tesangwa tajungba kumdaktsütsü, mapa tamajung inyakba ajemtsü, nüburtem timtem balala nungi kumzüktsü aser potholes mechi lenmang nung lendong ajurutsü aliba nungi kumzüktsü, ta ashi.

Asen yimti nung lokti tentet ajanga tanü tashinung mapa tajungtiba inyakbaji ibai alitsü aser tarutsü anogotem nung danga lokti tentet asoshi tatishitsü tajung ka ama amshitsüla, ta Ward 21 Welfare Committee ajanga ashi.

Asen yimti aser nüburtem ajungtsü asoshi DALT ajanga mapa tajung inyakba atema tenüngsang agütsütsü langa lir. Nenoki nüburtem asoshi mapa tajung inyakba atema pelaba lemsateper, ta iba Committee ajangasa ashi.