Warne o Tendulkar na nem T20 series ayongtsü melar: ICC

New Delhi, September 15 (Agencies): International Cricket Council (ICC)-i Cricket asayar mongin, India nunger Sachin Tendulkar aser Australia nunger Shane Warne na nem United States (US) nung asaya 3 densemba Twenty20 (T20) series ayongtsü temelaba agütsüogo.

“Tendulkar o Warne nati  T20 series-ji taküm 2015 küm  November ita asayatsü ayonga lir aser iba sentong agiba ajanga ICC nem tetsükdakba kecha bener marutsütsü. Aji oda, tenati lateta aliba temzüng ozüng kübok iba series-ji ayongtsü nangzükba sülen kasaji ayonga asayatsü temelaba agütsüogo,” ta ICC-i tanü sangoktsü.

Ano külen, ICC-i USA Cricket Association (USA CA) anentsüba sülen US nung cricket asayabaren ketdang asütsü asoshi telok tanga ka tentetja aliba osang jangjaogo.

Ano, Tendulkar o Warne nati ayongba T20 series-i aazükba senotsü shilem ka ICC senpongi yoktsü aser kasaji amshia US nung cricket jenjang tajungba kümdaktsütsü sentong renema lir.

Tenati ayongba T20 series nung Rahul Dravid, Glenn McGrath, Jacques Kallis, Adam Gilchrist, Sourav Ganguly, Brian Lara, VVX Laxman aser Wasim Akram nunger densema tongti asayar 26-i tanü tashi nung shilem agitsü renema lir.

Chicago kübok Wrigley Field, New York kübok Yankee Stadium aser Los Angeles kübok Dodger Stadium nunger nung asayatsü renemba T20 series temelaba anguba sülen Tendulkar o Warne nati maneni tongti asayartem anioktsü sentong renemba osanga jangjaogo.