Waromung yimtak CKM 51 buba lokti senden tenzükogo

Bodbarnü Waromung nung Agriculture Parliamentary Secretary aser NSAMB Chairman, Dr Benjongliba Aier-i Changkikong Kaketshir Mungdang 51 buba Lokti Senden tenzüktsüdang agiba noksa angur.

Waromung, Jan. 06 (TYO) : Bodbar aonung nungi tenzüka yangi Waromung yimtak Changkikong Kaketshir Mongdang (CKM) 51 buba lokti senden sentong tenzükogo. Taonung iba mongdang sentong ya Parliamentary Secretary, Dr Benjongliba Aieri lapoktsü.
Iba mongdang nung Changkikong kübok yimtsüng balala nungi teshimtet purtem 350 shi arua dendagi. Iba mongdang sentong ya anogo asem nü agia amongtsü.
Taonung iba mongdang lapokja jembidang, tetushi tesemdanger, Dr Benjongliba Aieri kaketshirtem dang tazüngbaji degree anguba kija agi meperir saka lokti nem tajangzük agüja tenzüktsübaji dang tongtibangtiba lir, anungji kaketshirtemi meranga inyaktsüla ta ayongzük.
CKM lokti senden omen ” Peisasa taküm litetba’ omen nung ajemdaker ken o kar lemsatepdang, Dr Benjongliba Aieri ashiba agi, tang Nagaland nung zünger mapa mengui alirtem nisung 60,000 dak tali tenüng agüja lir, anungji ajaki sorkar mapa dak merangloki peisasa inyaktetba mapa bushia inyaktsüla, iba jagi dang peisasa taküm litettsü.
Iba sentong nung tongti o jembir, Heritage Publishing House nung tongti ketdangser, Dr Lanusangla Tzudir-i mungdang omen nung jembidang, Naga nunger lanurtem asoshi peisasa taküm liteta aotsü asoshi inyak tenzüktsü mapang agi tongogo ta metetdaktsü.
Naga nunger lanurtem sorkar mapa atadang, tanga mapatem aser Naga nunger rongsentem ajak tanga bendanger aser tsümartemi bener aor, anungji aji meteta lanurtemi timtem agia peisasa taküm lia aotsü mapa inyak tenzüktsüla ta laisa metetdaktsü.
Item nüngdak ataloktsü asoshi tang kaketreju nung sayuba kaketshisatsütem ya khen meyipa reprangshia yanglushir, lanurtem dang mapa tapu balala inyak sayuang tajungba asütsü ta laisa metetdaktsü.
Taonung mezüng sentep sentong Waromung Shisashir Telongjemi lapoktsü aser Waromung Baptist Arogo nung sannüker, Tsuktimereni sarasadem.
Kasa sentong nungsa Waromung Putu menden nung mendenbuba Lanumereni tepela o ashi aser Changkikong Senso Mungdang tir, Imtipokyim; Japukong Kaketshir Mungdang tir, Rongsenmongba aser SDO PHED, Mkg Tinu Longchar nungertemi tajungshi o jembia liasü.
Brehostibar nü mezüng sentong nung School Education & SCERT minister, Yitachu tongti tesemdanger asütsü.