Warriors puri Cavaliers kokogo

Aami (June) 9, 2018 (Agencies): Rogonü Golden State Warriors puri 108-85 Cleveland Cavaliers madak takok ngua season pezübuba nung NBA title asembuba kokogo. NBA Final ya best-of-seven yimya nung asayar aser Golden State puri asaya pezü prongla koka iba asayamung benogo.
2007 küm San Antonio puri 4-0 agi Cavaliers pur akokba sülen tang mezüngbuba Warriors puri 4-0 agi parnok kokogo.
“Iba asayamung akoktsü kanga tasak aser küm pezü tsüngda asemben akokba ya kanga jangratemtsüka lir,” ta Warriors guard Klay Thompson-i ashi.
Tatembangbuba asaya nung Stephen Curry-i points 37 angu aser NBA Finals Most Valuable Player Kevin Durant-i point 20 bendenloktsü.
“Iba takok ya tamamangtsü ka lir,” ta Curry-i ashi.
Golden State pur club otsü nung tang tashi nung parnoki iba asayamung trokben koka lir aser Chicago Bulls pur den tasembuba jenjang nung lir. Warriors puri Philadelphia nung amendaker aliba mapang nung 1947 aser 1956 küm iba asayamung kokogo aser San Francisco Bay-i 1962 küm belener aoba sülen 1975, 2015 aser 2017 küm kokogo.
Final nung taküm agi küm pezübuba adonga Warriors pur Cleveland den asayaogo.
Cavaliers nungi nüngtugu asayar LeBron James, shiba taküm agi final 8buba nung atonga asayar, pai point 23 idaktsü. Pa Miami nungi asayadang iba asayamung anaben kokogo aser Cleveland den 2016 küm koktetogo.