Warsaw nung NATO Summit 2016 amen tenzükogo

Warsaw, July 08 (Agencies): North Atlantic Treaty Organization (NATO) nung züngsemba alima linüktemi Poland yimtiba, Warsaw nung tanü, Hokolbar nü nungi tenzüka anogo 2 tashi tongti senden amen tenzükogo.
Tan senden amenba ya Cold War sülen NATO-i ayonga amenba tongtipangtiba senden lir ta züngshitsü tenzüka lir.
Tanü senden nung US Tir, Barack Obama-ia shilem agia liasü aser pai Brexit ta ajaba Britain linüki European Union (EU) toksütsü lemtetba den sentakba onük tongtipangsüa benoka jembi.
“US-i Europe ajunga lungjema lidaktsüner aser iba nükjidong nung Brexit atalokba sülen EU aser Britain na taoba mapang ama maneni sentaktepa alitsü ajungshir,” ta Obama-i metetdaktsü.
Britain-i tawa EU toktsütsü lemtetba sülen Europe nunger lenirtemi tebilemtsü khuret benoktsü tenzüka lir.
“Britain EU toktsütsü maparen tangatettep nung aser ken o tamajung kecha madoki agitsü tamang akar. EU lungjemba sülen EU nung züngsemba linüktem rong nung tongpang raraba osang mali aser iba ama tensa tajung bener arutsütsüji kanga dang tongtipang,” ta Obama-i metetdaktsü.
Obama-i tanü senden nung o jembiba jakdang European Council Tir, Donald Tusk aser European Commission Tir, Jean-Claude Juncker na den jurila senden ka amenba osang angazükogo.
Ano, Russia-i par mitkar tashi amshia tashiyim inyakba maparen nokdangtsü asoshi Obama-i NATO ajungshia liasü.
Atsüka alir prangpong abener telok kati meta talang nungi US kübok Dallas yimti nung police ketdangser 5 tashi kaseta lendong atalokdaktsüba atema aitsüba olen ka Obama-isa tanü metetdakja liasü.
Russia-i Ukraine ket nungi Crimea peninsula tashiyim agi agiba den külemi, Ukraine sorkar anemertem pusema yariba maparen anentsü tebilemba aliba tanü tashi monguteti lir aser ibaji ajanga Russia den kidangsüa aliba linüktemi tebilemtsü akatsü tenzüka lir.
Ano külen, NATO tenteter küm 70 tashi nung tang mezüngsüa, tensa azüoktsü aser nungdakra, tongpanga raradaktsütsü asoshi par miktar züngsem 13,000 tashi Spain nung temerenshiba agidakja lir.