Washington: Alima lenirtemi IS anemtsü senden amen tenzükogo

Washington, July 21 (Agencies): Alima linük 30 dak tema nungi defense aser foreign minister-temi US yimtiba, Washington nung Islamic State (IS) kiralongrar samatsütsü tasa aser lenmangtem bushitsü senden yashi, Bodbar nü nungi tenzüka amenba osang jangjaogo.
“IS telok meshimeshia samatsüba sülen par teloki lendong kanga sashia bener arutsüba Iraq aser Syria na  tanaben yanglushitsü mapatong nung yariteptsü onük yashi senden nung shilem agirtemi benoka jembiogo,” ta US Defense Secretary, Ash Carter-i tanü metetdaktsü.
Iraq sorkari IS telok madak takok ngua rara, par ket nungi Iraq  kübok Mosul aser Syria kübok Raqqa na densema, tongti yimtitem tanaben agishitsü maparen nung maneni yaritsü nükjidong nung linük aikati taoba mapang agütsüba teyari sen den timba agütsütsü nangzüktepba osanga pai metetdaktsü.
Alima tesem balala talisa, Iraq aser Syria na nung tesep kanga sashia tenteta par linük ana nung lendong kanga sashia atalokdaktsür IS telok madak takok ngua raradaktsütsü asoshi  IS den tongpang rarartemi nungdakba osettsüset aser teyari peria agütsüsü tayongzükba olen ka Carter-i yashi senden nung lemsatepba osanga angazükogo.
US-i aniba alima teloktep mikartemi yaria nungtiba Iraq mitkartemi Iraq anüdoklentip tsütsülen tentetba Mosul yimti IS ket nungi tanaben agishitsü terenemshiba agiba mapang ka nung alima lenirtemi anogo 2 agia tan senden amener lir.
Carter-i tan agi IS anemtsü senden 4 buba ayonger lir.
Ano külen, Iraq nung tongpang kanga sashia raraba ajanga timtem toushi tia ajurushiba Iraq nüburtem nem nungdakba teyari agütsütsü asoshi teyari sen, dollar sen billion 2 shi bushitsü nükjidong nung US Secretary of State, John Kerry-ia State Department nung senden tanga ka yashi ayonga amenba osang angazükogo.