Washington nung Obama aser Modi na senden amentsü

New Delhi/Washington, May 20 (Agencies): Taruba ita White House nung US Tir, Barack Obama-i India Ato kilonser, Narendra Modi ajurua senden amentsü, ta Hokolbarnü White House-i sangdong ka ajanga metetdaktsü.

June 7, 2016 nü senden nung Obama aser Modi nati rongsenkettsüng ainba, alima tzümopung melenshiba aser clean energy den külemi security aser defense nung amalitepa inyaktsü atema jembitsü, ta kasa sangdong ajanga ashi.

Ato kilonser Narendra, Modi-i, June 7 nungi tenzüka anogo ana US semdangtsü, aser iba mapang nung pai US Congress Joint meeting nunga jembitsü aser US Tir, Barack Obama dena defence, security aser energy onüktem jembitsü. Deobarnü Modi Iran linüki aotsü aser June 4 nungi anogo ana Qatar linük semdangtsü, ta tanü Indian External Affairs Ministry-ia sangdong ka ajanga metetdaktsü.

Ministery-isa, “Ato kilonseri tang semdangba ya tongtibangsüa rongsenkettsüng, energy, alima tzümopung, defence aser security atema inyakbatem asadangtsü aser tarutsü nung taliba amalitepa inyaktsü atema lir,” ta ashi.

US Congress joint meeting nung jembir India nunger Ato kilonser pongububaji Modi asütsü. Tamalen India Ato kilonser, Manmohan Singh-i July 19, 2005 nü jembia liasü, Atal Bihari Vajpayee-i September 14, 2000 nü, P V Narasimha Rao-i May 18, 1994 nü aser Rajiv Gandhi-i July 13, 1985 nü jembia liasü.

US semdangba mapang Modi-isa US company tulutem nungi CEO tem den jembitsü.