Washington:Tetsür meyirjang aikati Trump-i anema longkak aitsü

London, January 21, 2017 : London nung Donald Trump anema tetsürtemi longkak aita American Embassy nungi central London nung aliba Trafalgar Square tashi jajaba noksa yangi angur. 

Washington, January 21 (Agencies) : Donald Trump-i US Tir menden melenzüker tananü tetsür meyirjang aika Washington nung adenshia, pai benokba tebilemtsü onüktem aser pa jangratem apia jembibatem anema parnok ola yimsüsür tasenba nem angashidaktsütsü mechi nung longkak aitsü.
Hokolbar aonung aser Honibar anepdang longkak aitsüpur bus gari aser tayimtsü sünga mener linük yimtiba nung adenshia lir.
Longkak aitba sentong, ‘Women’s March on Washington’ nung celebrity aser speaker tem dena lir aser parnoki National Mall tashi longkak aita jajatsü.
Hokolbarnü adenshiba tetsürtemi Trump-i jembiba maksütsü otem parnok korang nung zülua semer adenshi. Pai tetsür maksüja jembiba video ka linük yimtiba sünga prokshia liasü, ta osangbenertemi ashi.
Longkak aiter tetsürtemi tashitsü aika lir.
Tang longkak aitertemi Trump Tir menden atema metoktepdang nungi pai maksütsü o jembibatem aitsür.
US aser alima tesem balala nung longkak aika aitsü sentong lir.
Hokolbar aonung Belgium yimtiba Brussels nung tetsürtemi Trump magizüker ta sayuba temaitsü candle bener adenshia “Lights for Rights” rally agi.
Yimti nung Trump anema longkak aitdang longkak aitertemi kijibatem raksaja, garitem nung mi senoktsür police tem den raratepba sülen tananü iba rally agia liasü.
Tang tetsürtemi longkak aitsü sentong renema aliba nung NAACP, Planned Parenthood, American Federation of Teachers, pro-immigrant aser pro-environment teloktem dena lenir aser meimchir temeden atema rarartem jenti adentsü.