Wasim Akram amenba gari nung injang kaloktsü: Police

Karachi, August 05 (Agencies): Mejangjatetba nisung kati taoba Pakistan cricket captain, Wasim Akram amenba gari nung injang kaloktsü saka Akram takümbo kümzükogo ta police-i tanü Bodbar nü metetdaktsü.
“Akram amenba gari nung tanü injang kalokja amakbaji pa kasettsü merangba tatalokba ka masü saka yimdong nung mit adoka tashiyim inyakba tatalokba ka lir,” ta police-i osang jangjashitsü.
Alima ajunga nung One-Day International (ODI) asayar tajungtiba ta züngoksang, Akram-i ayongba bowling camp nung shilem agitsü asoshi Pakistan kübok Karachi yimti nung tentetba National Stadium bushia aodang tanü yimti yimdong nung lendongji ajurua liasü.
“Gari tanga kati ni amenba gari nung tsükshiba sülen gariji anentsü asoshi onoki gari anishisang dang ashi aser idangji gari anishisangi gari nungi ayazüka ni amenba gari nung injang kaloktsü. Ajisüaka, tanü lendong nung nisung shinga meyiru,” ta Akram-ia metetdaktsü.
“Tanü injang kalokja amakbaji pei mit mekokteti tashiyim agi inyaka sayuba dang lir. Onoki CCTV video ajanga agiba gari aser gari anishisang indang noksa ngua lir aser aibelensangji kobi meli pua pa nem tapet temerenshi agütsütsü,” ta Senior police ketdangser, Munir Shaikh-i metetdaktsü.