Water Resources Department nung workshop ka agi

January 29, 2020 nü Chief Engineer, Water Resources Department, Tsuktinungsang aser shisalen sayur Haridasan T.K den Water Resources department nung officers aser Accounts and Auditing training agirtem külemi tangokba noksa ka yangi angur.

Dimapur, Aenjeti/Jan. 29 (TYO): Water Resources department, Kohima nung January 29, 2020 nü Accounts aser Auditing indang workshop ka agiogo. Iba sentong tenzüka Water Resources Department indang Chief Engineer, Tsuktinungsang-i jembiba mapang, senotsü ketdangsüba (accounting) indang yimya tasen den lirumedema aotsü mechi Government of India totuyuba nung department renema alitsü nüngdaker aser iba ajangadang departmenti asüngteta inyaktsü, ta ashi.
Accounting yimya tejen akümba indang sasa jembiba mapang pai ashiba agi, account section nung department timtem jenti ajurua liasü, kechiaser tamalen ‘Civil System of Accounts’ system amshiba ya parnok inyaksangshi den meputep liasü aser biil tem mapang shidak nung magütsütet, anungji billing system den meputeptsüsa aküm.
Saka department tajungba küma ao aser audit system tajungba nung inyaktsü asoshi ‘Performa bill’ benok aser PIFMS mode amshia department-i project tasentem atema civil system of billing ta tapet yimya nung melen, ta pai ashi.
Paisa training agirtem dang pei tebilemba aser tangatetba aser mejangjaba lemsateptsü ajungshi, aji asünung dang Accounting tajungba nung inyaktettsü, ta ashi.
Kasa sentong nungsa shisalen sayur, Sr. Audit Officer, Haridasan T.K ajanga Accounts and Auditing aser Performa Bill System indang tejangja lemsatep, ta ketdangser sangdong ka ajanga ashi.