Watson-i International Cricket toktsütsü lemteter

Melbourne, March 24 (Agencies): Australia nunger all-rounder, Shane Watson-i tang tasayadak ICC World Twenty20 (T20) asayamong tembanga shilem agiba sülen international cricket asayatsüren toktsütsü lemtetba osang ka metetdaktsüogo.
“Ajisüaka, linük balala nung ayongba T20 asayamongtem nungbo ni maneni shilem agitsü lemteta lir,” ta pai osang jangjashitsü.
Arishi küm 34 tain Watson-i India nung ayonga asayaba Indian Premier League asayamong nung Royal Challengers telok tenüng nung shilem agitsü renema lir.
Watson-i Test cricket aser One-Day International (ODI) asayatsürena yaküm, 2015 toktsüba osang jangjaogo.
Watson-i ajak agi Test asaya 59 tashi nung shilem agia, runs 3,731 yangluba den külemi, wicket-a 75 tashi agia lir.
Pai ODI asaya 190 tashi nung shilem agidanga ajak agi runs 5,757 yangluba den wicket-a 168 tashi agiba osang bushitetogo.
Ajisüaka, Watson-i T20 asaya nungbo 56 ben dang shilem agitsü maongka ngua ajak agi runs 1,400 dang yanglua lir.