Watsü Bodbar bazar ajanga tetsür jenjang ajungketba kishi lapoktsür

Sashimeren Jamir.
Mokokchung, July 12 (TYO): Tetsür tekübok jenjang nung alirtem ajungkettsü nükla yur inyakba – ‘Watsü Bodbar Bazar’ ya 2010 küm Watsü Mungdangi achayanga tanü tashi takok ngua arudagi. Iba ya Watsü Mungdangi inyakba mapa tajung rongnung ka ta nüburtemi züngshir.
Taoba mapang iba bazar ya Mokokchung Imlong Place nungsa mena liasü, ajisaka, nübur shishilembatsü mesatemba ajanga tangbo Mokokchung Municipal Council complex belena amener. Aluyimertem aser kibong aika iba ajanga lenmang aisü nung tajangzük anguba kuli lir.
Tanü iba osangbeneri ‘Watsü Bodbar Bazar’ nung amener aonsotsü ayoker aser yangji shishir kar ajurua jembidang, “Onok hajira mouteterji iba ama lapokba ajanga tajangzük aika angur aser iba ajanga kibong nung tapok tulu ateper. Iba bazar ya hopta nung anaben lapok nunga kanga ajungtsü,” ta aonsotsü ayoker tetsür kati ashi.
“Iba ya ajanga aluyimer aser aonsutsü ayokertem nem pei züsentetba ayoktsü maongka lapoktsür, aji dang masü, talir/tagir nema pei chinüba aonsotsütem jenjang dalang agi agizükben anguba ya jangratemtsü lir,” ta yangji shishir kati ashi. “Kokra tayokertemi aonsotsü kasasa masü saka tangari mabenba aosotsü tapu balala bener arua ayoktsüla,” ta paisa tebilemba ka lemsatep.
“Iba bazar nung taginüba aonsotsü tapu aika angur aser jenjanga akhi mapang dang nungi tajemba yong agütsür, anungji, iba bazar ya kanga junger,” ta yangji shishilembar kati ashi. “MMC complex ya akhinübo azüngazünger dang alir saka iba bazar yagi kanga lemsadaktsür (lively kümdaktsür),” ta laisa shisem.
“Iba ama bazar lapoka amenba ya junger saka külen kabo complex kanga janar, anungji tayoker aser talirtem na pronglai awashi meteta aser merükmejua shishilembatsüla,” ta complex nung dokan amener kati ashi. “Iba ama bazar lapoka amentsü asoshi tanga tesem kar yakta bushitsüla,” ta laisa shisem.
Ano shishir katibo, “Hopta nung khen iba amai bazar alidang, aonsotsüji jenjang teyarika (reasonable) agi ayoktsüla saka aonsotsü karbo jenjang tasak meshir, anungji, sen o aonsotsü na süktepa yokra kanga ajungtsü,” ta tebilemba ka ashi.
“Tzünglu arudangbo iba complex nung tzü asenba agi awatsüng amai akümer aser nüburtemi meshitetba timtem aika ajurur, anungji, MMC-i iba ya yakta mapa kar inyakadoktsüla,” ta Mokokchung town nung alir senso kati iba osangbener den jembidang ashi.
Tanü iba osangbenerisa Mokokchung Addl. Deputy Commissioner, Sachin Jaswal IAS den jembidang, “Aonsotsü ayokertem atema MMC complex nung masü tesem balaka tebushidak lir, iba dak sentakba nung akokba tashi osangtsüsang balala agidar,” ta pai ashi. “Kodang iba tesemji ngudir aonsotsü ayokertem asoshi tebilemtsü kangabo melii sademsadema ayoktsü,” ta paisa shisem.
Watsü Bodbar Bazar nung amener shia nungi registration senpak 10/- sarur, iba sen jagi MMC nem saru (tax) agütsür aser maparen balala inyakba nung amshir, ta angazüker. Iba bazar ya Bodbar shia anepdang 7:00 ako nungi nikongdang 3:00 ako tashi lapoker. Iba bazar ajanga Mokokchung district nungi dang masü saka Wokha, Zunheboto aser Tuensang district nungi aluyimertem arua pei züsentetba ayoktsü maongka lapoktsür.
Atangji, Bodbar bazar ya “tayoker o talir na ajurutep ama” ta jembiba mesüka lir. Watsü mungdangi ibai nükla tulu yur tenzükba ama lenmang aisü nung tetsürtem jenjang ajungketba mapa agi sayur.