Watsü Mungdang-i Dec 5-8 ‘Aowli benjungmung’ ayonger

Mokokchung, Nov 22 (TYO): Watsü Mungdang-i ayongzüka taruba December ita 6 nungi tenzüka anogo asemnü tashi Imkongmeren Sports Complex Mokokchung nung mezüngbuba “Aowli Benjungmung 2018” ta sür sentong tulu ka ayongzüka lir, ta Watsü Mungdang ketdangsürtemi Brihostibarnü parnok office nung osangbener senden ka jaoka jembidang metetdaktsü.
Iba benjong ya tongtibangsa Aor Aotsür rongsenkettsüng aser loktiliba jenjang ajungketa taküm libaliru renloktsü aser Aor sobaliba, yimsüyimbong aser teka mapa tapu meyina wazüka ayutsü nükla yur ayongzüker, ta Watsü ketdangsürtemi ashi.
2017 küm 21 buba Watsü Mungdang inti senden akadang rongsenkettsü jenjang ajungketa libaliru renloka aotsüba dak rangloker inyaktsü bangzüng ka renema ayu. Iba bangzüng dak ajemdaker 12th Dec 2017 nung ‘Aowli Benjungmung’ maparen ya tenzüka liasü aser taküm küm nungi ibai mezüngbuba sentong ayongzüker aser ibai kümshi agiba sentong ka asütsü, ta parnokisa shisem.
Iba benjung ajanga Aor Aotsür lokti balala nungi adenshia kati ka metettepba aser angazüktepba den külemi ano peii züsentetba aser inyaktetba osettsüsettem sayuba den ayoktsü asoshi sabang tajung ka asütsü aser iba ajanga lokti aser rongsenkettsüng jenjang ajungkettsü imlar, ta parnokisa ashi.
Aor Aotsür dak sempet tajung aika lir, parnok nemji sabang lapokja anitentsü aser akhi asen tsüraburi mapa meranga inyakba sobaliba tanaben shilua bener arutsü, takar lima ka nung sensaka malitsü, iba benjung ya tebilemba aika nüklaa yur ayongba ka lir aser kenübo iba nungi süngjang tajung adangtsü imlar, ta Watsü lenirtemisa metetdaktsü.
Aowli tetzü tensa tia ajak tizükteta metitemi bener aoba dang ajar. Kija/telok shirnoki osettsüset aser chiyungtsü tajung züsentetdir/yanglutetdir/inyaktetdir, itemjibo brand tenüng ‘Aowli’ küboki aidaktsütsü, ta parnokisa ashi.
Ibai tanga benjung ka ama masütsü aser ‘plastic free’ benjung ka asütsü. Benjung mapang am mesüra paper agi yangluba taseptsü (tonga) mesüra sü agi yangluba yangkhu dak alaka plastic yangkhu/taseptsü khenyongi amshitsü memelatsü, ta parnokisa metetdaktsü.
Anogo asemnü benjung nungji; olaangla mapa, chipo atepba, yongsen mapa, asaya balala (fun games), chiyungtsü ayokdak tesem (food court), naro, süoshi, teka mapa, Christmas ken tentepba, bonfire, Ao ken atenertem asoshi sempet sayuba sentong ka alitsü, sobaliba saisapong tetoktepba aser town temeket arogo balala Youth Department-tem rongnung Christmas süngdong yangluba tetoktepbatem alitsü.
Iba benjung nung kija aser telok kari danga stall lapoknüra Watsü Mungdang office nungi form agizüktsü akok aser mezüng arur nem tama maongka agütsütsü aser form agizüktsü atema 30th November 2018-ji tatembang anogo asütsü, ta parnokisa metetdaktsü.