Watsü Mungdang ‘Ketmong anogo’ takok ngua mungogo

Mokokchung, April 24 (TYO): Alima aser nübur asoshi Watsü Mungdang-i mapa tajung ka inyakba temaitsü “Ketla Tongjem” (Reaching out the People) omen nung ajemdaker Ketmong anogo 2016 April 23 nü AKM Conference Hall nung MMC kübok jila aokertem nem tetushi agüja Awareness Campaign ka kanga takok ngua agiogo.
Watsü Mungdang 19 buba inti mungdang nung lemtetba ama ‘Ketmong’ anogo ya taküm agi küm tasembuba takok ngua amunger aser iba anogo Watsülartemi lokti aser nübur atema teyari mesüra mapa tajung balala inyaker.
Ketmong tetezü mapa ajak nung awajema tetsüri teka ia tomong keta inyakba dang ajar, ta Dr. Imlirenla Walling-i ratettsüba den Watsü Mungdang ya lokti nung tetsür-tebur bendangshidang melidaktsütsü, sobalibaren, rongsenkettsüngren jenjang ajungkettsü, libajen wazüka ayutsü aser tanülaren ajak nung tetsüria shilem agitsü nükjidong yur inyaker telok ka lir ta rajemja liasü.
Watsü Mungdang ajangasa temeket tesem merükmejuba nungdang masü saka teyari nüngdaka alir nüburtem nema akokba lenmang nung teyari agüja nungiter.
Kasa sentong nungsa jila aokertem dang taoba President L. Obangla-ia nendaka inyakba nung temoatsü lir ta asüba onük nung ajemdaker jembidang tilateri mapa ka dangji ta sür ila-a mebilemtsü ajungshi. ‘Merükmejua alibaji nüchiso anguba dang nungi tongtibangba” ta linük tebu Mahatma Gandhi-i jembiba shidih O süa arua jembidang merükmeju melira kecha lokti-ia tangar memeneper anungji jila rangben aokba mapa inyakba tejak tenteta bilemang ta laisa ajungshia liasü. Tanü tendak reprangdangra azüng-zülu tulu liaka mapa ajak nung nendaka inyakba nübu dang bushiba lima kümogo, anungji pei nem nungloktsüba mapaji tenüng agi masü saka alimai temulungsüa agizüktsüsa nendaka inyakang ta laisa ayongzük.
Wt. Moanungla-i ketdangsüa aniba sentong nungsa Dr. Limanaro-ia koda anema alitsü item terasa taroktiba onüktem lemsatep aser Ketmong temaitsü MMC kübok jila aokertem nem Watsü Mungdang-i senpet lemja liasü.