Watsü Mungdang “Ketmung Anogo” tanü amunger

Mokokchung, April 13 (TYO): Watsü Mungdang-i 2013 küm nungi tenzüka amungba “Ketmung Anogo” taküma April 14 anogo nü amungtsü. Watsü Mungdang mendenti ajanga sangdong ka nung jila aser yimtsüng balala ajak nung telentem dang ‘Ketmung Anogo’ salem abenba den taküm küm-a pei telen shia nung iba anogo tetsür ka teinyaktsü tim nübur aser linük atema bendanga agüja sentong ayonga amungtsü renema aliba tajungtiba nung mungtettsü teimla akar ta tayongzükba tulu Watsü Mungdang President Maongienla aser general Secretary Moanaro ajanga sangdong ka nung metetdaktsü.
Watsü Mungdangi ‘Ketmung Anogo’ ya 19 buba Watsü Mungdang inti senden nung lemteter 20 buba Watsü Mungdang ketdangpurtemi 2013 küm nungi tenzüka amunger. Iba sentong ya Watsü atema anogo temeja (red letter day) ka lir aser iba mapang telen shia-i alima aser nüburtem ajangzüktsü mapatem inyaker.
Taküm 2018 Ketmung Anogo “Romakasemsa” tetezü Engraji agi “Green & Clean” omen kübok Watsü Mungdang telentem ajak nung lungsoa amungtsü renema lir.