Watsü Mungdangi ayongba 2 buba Aowli Benjungmung tanü nungi tenzüker

Mokokchung, December 11 (TYO): Watsü Mungdangi ayongzüka 2 buba ‘Aowli Benjungmung’ taküma Dec 12 & 13 anogo ananü yangi Imkongmeren Sports Complex Mokokchung nung akatsü asoshi mazüngi renemshidaki.
Iba benjung mapang tongtibangsa mozü mamshii züsentetba chiyungtsü (organic products) tapu balala, tsünüsempongtsü/metsüjangnütsü tapu balala, naro tapu balala, chiyungtsü balala ayokba stall-tem, teka mapa/olangla (handicrafts) aser tanur tain ajak asayatsü atema ‘fun games’ balala lapoktsü, ta angazüker.
Iba benjungmung tenzüktsütsü atema Nagaland Public Service Commission nung züngsem, Wt. Chubala Wai tetushi tesemdanger ka ama jaoka lir. Dec 12 nü iba sentong anepdang 10:00 ako nungi tenzüktsü. Mezüng anogoji Yar tsüngsang, model display aser Indigenous Christmas Tree tetoktepbatem alitsü aser nikongdang “Metsüpong” publication sayatsü aser Sangbang & Kongro Aowli 2019 ta sür sentonga ka alitsü.
Tananüji sorochiok (indigenous cooking) tetoktepba ka alitsü. Iba anogoji ano tetsürtem D.C XI o Watsü XI na Exhibition Football Match ka asayatsü. Nikongdang 4:00 ako nungi tenzüka tatembang sentong agitsü aser iba sentong nungji Mokokchung D.C Limawabang Jamir tetushi tesemdanger asütsü jaoka lir.
Iba benjung amungtsüba ya 2017 küm 21 buba Watsü Mungdang lokti senden nung renemba bangzüng ka lir. Aowli Benjungmung ya tongtibangsa lenla balala nung maneni taküm lia aotsüba atema ajungshiba den taoba mapang tsüraburtemi toktsüba sobaliba inyaksangshi tajungtem wazüka ayutsü nükjidong nung amunger.